اسلام آباد۔ 21 اگست (اے پی پی) وزیر مملکت موسمیاتی بدلی زرتاج گل پارینے کہ بنجائی دارالحکومت اسلام آباد اٹی پلاسٹک پولی تھین بیگ آتیا پابندی ءِ بے مٹ کرسا ملک انا ایلو بشخ آتسکان ودفنگک،داپابندی ءِ حکومتی اونر شپ دوئی ءِ۔ دا بابت ہچ گہس ءِ کانود ءِ دوٹی ہلنگ نا موکل تفنہ، حکومت تینا رٹ ءِ برجاتخک۔ راج انا غٹ تپہ و شریدار آتون اواری اٹ چاگڑد ءِ پلاسٹک نا کچٹی آن پاک کینہ۔ او چارشنبے نادے آ داڑے پریس کانفرنس آن تران کریکہ۔ اوپارے کہ ساڑی حکومت پلاسٹک آن ودی مروک آ کچٹی ءِ تالان مننگ آن توننگ کن پلاسٹک پولی تھین بیگ آتیا پابندی خلکونے۔ دانا بناءِ 14 اگست آ بنجائی دارالحکومت اسلام آباد آن کننگانے، دامہم ءِ اسہ مثال اس کرسا ملک انا ایلو بشخ آتسکان ودفنگک۔ اوپارے کہ پلاسٹک شاپنگ بیگ آتیا پابندی نا پڑو ءِ 6 تُو آن زیات وخت مہالو کننگاسس۔ دا اناگت ءُ فیصلہ اس اف، دابابت پوریا گر آتے ہم پت اٹی ہلکوسن و اوفتے پاننگاسس کہ او پلاسٹک نا شاپنگ بیگ آتا متبادل کنڈا کار۔ اوپارے کہ دروداڑے اسلام آباد اٹی اسہ فوڈ چین اتون پلاسٹک بیگ آتا کاریم اٹ اتنگ آ پابندی نا معاملہ غا ویل ودی مس، اوفتے مہالو ہم نوٹس تسوسن، وزارت موسمیاتی بدلی نا آفیسر آک تینا جندی کاریم کن آخا بلکن کانودی زمواری تے پورو کننگ کن ہناسر، اوفتے تون بایدے کمک کننگے۔ وزیر مملکت پارے کہ کانود آن ایڑتر ہچ کس اف، ہر بندغ جوابدہ ءِ، پلاسٹک نا شاپنگ بیگ آتیا پابندی نا فیصلہ نا اونر شپ حکومت تون ءِ و دا بابت اسٹ اس ہم حکومت نا رٹ ءِ چیلنج کپ۔ اوپارے کہ الس نا کمک آن بیدس اسہ گام اس ہم فائدہ مند ثابت مننگ کپک۔ ملک ءِ پلاسٹک آن ودی مروک آ کچٹی آن پاک کننگ کن غٹ ءِ اواری اٹ کاریم کروئی مریک۔ دا مسخت کن غٹ شاریک حکومت تون کمک کیر۔ اوپارے کہ 2013ء ٹی ہم داوڑنا اسہ ایس آر او اس جاری کننگاسس ولے اونا پرخ دائس کہ دا ایس آر او آ عملدرآمد کننگ تویسس۔ زرتاج گل پارے کہ پاکستان اٹی پلاسٹک نا شاپنگ بیگ آتا کاریم اٹ اتنگ خلقت نا عادت مسنے۔ ہنداخاطران خلقت ءِ گڑاس ویل پیش بننگ ءِ۔ داعادت ءِ بدل کننگ اٹ وخت لگک۔ دامسخت کن نن ایلو گام گیج آتون اوار اوار خلقت نا رویہ غاتے ٹی ہم بدلی اتنگ اُن۔ اوپارے کہ بنائی وڑاٹ بیرہ پلاسٹک نا پولی تھین بیگ آتیا پابندی خلنگانے وخت اس کہ ایلو مصنوعات آتیا پابندی خلنگ تنے۔ پلاسٹک نا بوتل وریپرآتیا پابندی نا معاملہ ءِ پدریسہ ہُننگک، دا عمل سلپک۔ اوپارے کہ پنجاب نا وزیراعلیٰ ہم صوبہ ٹی پلاسٹک بیگ آتیا پابندی نا پڑو ءِ کرینے وخت اس کہ کے پی کے و گلگت بلتستان اٹی مہالو آن دا بابت کاریم مننگ ءِ۔ سندھ انا وزیراعلیٰ ہم پابندی نا پڑو ءِ کرینے۔
