اسلام آباد۔ 21 اگست (اے پی پی) وزارت موسمیاتی بدلی، قراقرم یونیورسٹی نا کمک اٹ کلین گرین ہنزہ نا پن اٹ اسہ پروجیکٹ اس بناکیک۔ سلاہ ئی ڈٹ انا رداٹ قراقرم یونیورسٹی نا ہنزہ کیمپس اٹی ہر تُو اسہ دے سفائی ستھرائی کن تخنگک۔ تخوک آ دے آ تعلیمی ادارہ ٹی لس تعطیل مریک وخت اس کہ طالب علم آک دادے مچ آ شار و کیمپس ءِ ساف کیرہ۔ اوکان پد دا ڈٹ ءِ مچ آ پاکستان اٹی اسہ ملک گیر مہم اسے نا وڑاٹ لاگو کننگک۔ وزارت موسمیاتی بدلی صوبائی حکومت آتے کانود سازی و ایلو تکنیکی معاملہ غاتے ٹی کمک فراوان کیک وخت اس کہ دا پروجیکٹ کلین گرین پاکستان نا قومی ڈٹ انا بشخ مریک۔ داخیال آتا درشانی ءِ وزیراعظم نا سلاہکار موسمیاتی بدلی ملک امین اسلم قراقرم یونیورسٹی نا وائس چانسلر ڈاکٹر عطاء اللہ شاہ تون اوڑدہی ٹی کرے۔ ڈاکٹر عطاء اللہ شاہ بنجائی وزیر ءِ پارے کہ قراقرم یونیورسٹی تینا قیام آن پد چنکو وخت اسے ٹی اسہ اہم ءُ علمی درسگاہ سے نا وڑاٹ مون آ بسنے، ہرانا اعتراف ءِ کیہی جہانی و قومی ادارہ غاک کرینو۔ اوپارے کہ ہندا یونیورسٹی ٹی داوخت آ 80 آن زیات پی ایچ ڈی سکالر تینا فرض ءِ سرانجام تننگ ءُ ہراوڑ جہانی حدت اٹی ودکی آن پاکستان ایلو دنیا نا نسبت زیات باسن مریک، ہنداوڑ ایلو ماندہ پاکستان نا نسبت گلگت بلتستان نا ڈیہہ نا حالیت آک کیہی زیات نازرک و خطرناک ءُ۔
