اسلام آباد ۔ 16اگست (اے پی پی) پاکستان تحریک انصاف نا حکومت وزیراعظم عمران خان نا کماشی ٹی ہاءوسنگ نا بشخ اٹی انقلابی گام گیج چست کرسا 50 لکھ اُراتا تفنگ نا شاندار ڈٹ ءِ عملی دروشم اس تننگ کن نمان پیش رفت کرے و دا چرجوئی ٹی اسلام آباد و کوءٹہ تون اوار ملک انا چندی شار تیٹی ’’نیا پاکستان ہاءوسنگ پروگرام ‘‘ نا رداٹ چندی ڈٹ آتا باقاعدہ بنامسنے ہراڑان غریب و کم کٹیا کروک آ بندغ آتے اُراتننگ تون اوار اوار ہاءوسنگ تون گنڈوک 40 صنعت آتے مون آ دننگ، روزگار نا وارخواہی و معیشت ءِ سوگوی ملک ۔ وزارت ہاءوسنگ و تعمیرات نا ذراءع پارے کہ دا ڈٹ نئے بیرہ ہاءوسنگ نا بشخ اٹی حکومت نا الس تون کروک آ وعدہ غاتا پوروی نا کنڈا اسہ اہم ءُ گام اسے بلکن داڑان قومی معیشت ءِ تعلقدار تعمیراتی صنعت آتا مون آ دننگ آن سوگوی ملک ۔ ذراءع نا رداٹ 50لکھ اُراتا تفنگ آن کم کٹیا و تنخواہ دار تپہ غاتا ہاءوسنگ نا گرج آک پورو مریرہ ۔ وزارت ہاءوسنگ و تعمیرات دا ڈٹ انا سرسہب پوروی کن پراعتماد ءِ ہراڑان بے اُرا بندغ آتے چھت ملک و روزگار نا بھلو وارخواہی اس ودی مریک ۔ وزارت نا سینئر عہدیدار آتارداٹ وزیراعظم عمران خان تدوک آ تُو پوسکن آ پاکستان ہاءوسنگ ڈٹ اکن رجسٹریشن نا ارٹ میکو مرحلہ نا باقاعدہ بناءِ کرے ہرا کم کٹیا کروک تپہ غاتے اڑزان اُراتا تفنگ نا کنڈا اسہ اہم ءُ گام اسے، رجسٹریشن نا کمک اٹ درکار حساب و کتاب دوئی کننگ انگ ءِ تانکہ الس نا گرج و ڈٹ آعملدرآمد اٹی آسانی مرے ۔ عہدیدار نار داٹ اسہ جامع ڈیٹا بیس اس تیار کننگ انگ ءِ ہراٹی غٹ تعلقدارمعلومداری دستیاب مریک ، تدوک آ سال اکتوبر اٹی اولیکو مرحلہ نا بنا آن پد دا ڈٹ اکن پنجا لکھ آن زیات بندغ مہالو آن درخواست تسنو ، اسہ ویب پورٹل اس ہم جاری کننگانے تانکہ درخواست گزار آسانی اٹ اندراج کرفنگ کے ۔ بنجائی وزیر ہاءوسنگ اینڈ ورکس طارق بشیر چیمہ نا پاننگ ءِ کہ ’’پوسکن آ پاکستان ہاءوسنگ پروگرام‘‘ آن نئے بیرہ کم کٹیا کروک بندغ آتے کن اُراجوڑ مریک بلکن داڑان خلقت کن نوکری تا وارخواہی ودی مریک ۔
