مقبوضہ کشمیر اٹی مودی نا سیاہ کاری تا سوب اونا مون انگا دروشم مچ آ دنیا نا مون آ پاش مسنے
اسلام آباد ۔ 16اگست (اے پی پی) وزیراعظم نا سلاہکار موسمیاتی بدلی ملک امین اسلم پارینے کہ مودی نا سرکڑدہ ہی ٹی ہندو توا نا ڈٹ بے سہب مریک و انشاء اللہ کشمیر زوت آجو مریک ، مقبوضہ کشمیر اٹی مودی نا سیاہ کاری تا سوب اونا مون انگا دروشم مچ آ دنیا نا مون آ پاش مسنے، ملک اٹی سیلاب نا غٹ آن بھلا سوب پلاسٹک نا شاپر بیگ آک ءُ ہرا چاگڑدی کچٹی نا سوب مریرہ، پلاسٹک بیگ آتیا پابندی آن پوسکن آ کاٹیج انڈسٹری جوڑ مریک، چاگڑدی کچٹی نا مون ءِ توننگ کن ملک اٹی بجلی آن چلینگوک آ گاڈی درستی راستی کرفنگک، 18 اگست آ پلانٹ فار پاکستان مہم نا بناء آ ہر پاکستانی اِرا نیال خلے ، اسٹ اس پاکستان کن و اسٹ اس کشمیر کن، پلانٹ فار پاکستان مہم نا سرحال ’’اسہ بشر اِرا شجر‘‘ گچین کننگانے ۔ جمعہ نادے آ داڑے پریس کانفرنس اٹی موسمیاتی بدلی نا وزارت نا اسہ سالہ کارکڑدگی ءِ بیان کرسا وزیراعظم نا سلاہکار پارے کہ مقبوضہ کشمیر اٹی جاری بھارتی بیدادی داسہ مچ آ دنیا نا مون آ پاش مننگ ءِ و ہنداسوب ءِ کہ تدوک آ 50 سال آن سردخانہ ٹی بٹوک آ کشمیر نا ویل داسہ اقوام متحدہ نا مون آٹے ۔ اوپارے کہ جہانی برادریءِ کودک کشمیری تیا کروک آ بھارتی بیدادی نا چٹفنگ کن ہوش انا ناخن ہلوئی مریک و دا ویل ءِ ایسر کروئی مریک ۔ اسہ پین سوج اسے نا ورندی ٹی اوپارے کہ حکومت پلاسٹک بیگ آتیان نجات دوئی کننگ کن پرعزم ءِ ۔ اوپارے کہ احساس پروگرام نا رداٹ پچ آتا تھیلہ تیار کروک آ کاٹیج انڈسٹری نا است بڈی کن ہم سلاہ و سوج مرتب کننگک ۔ اوپارے کہ پلاسٹک بیگ آتا کاریم اٹ اتنگ نا بیست سالہ متکن آ عادت ءِ اسہ دے اٹی بدل کننگ مفک ولے پالیسی آ عملدرآمد کن ہراتم گام گیج کننگک تو پلاسٹک بیگ آک چٹرہ ۔ اوپارے کہ پلاسٹک بیگ آتیان نجات دوئی کننگ کن چلیفوک آ مہم نشان تننگ کن اف بلکن دانا چٹفنگ کن حکومت پرعزم ءِ ۔
