اسلام آباد۔ 08 اگست (اے پی پی) پاکستان مقبوضہ کشمیر نا بابت بھارت نا اسہ کنڈی گام گیج آتے مسترد کرسا پارینے کہ کشمیر نا جھیڑہ ہفت سال متکن ءِ و دا ویل ءِ بیرہ اقوام متحدہ نا قرارداد آتارداٹ ہی ایسر کننگ مریک۔ مقبوضہ کشمیر اٹی تازہ پیش رفت آن پد ہم پاکستان کرتار پور راہداری آ کاریم ءِ برجاتخا و داٹی ہچ ءُ اڑاند اس شاغپک۔ پاکستان چاگڑدی دنگ ءِ بند کتنے۔ مقبوضہ کشمیر اٹی تازہ پیش رفت نا بابت آن اٹارنی جنرل جہانی عدالت انصاف آن رجوع کننگ نا جاچ ءِ ہلنگ اُن۔ پنچ شنبے نادے آ ہفتہ وار پریس بریفنگ اٹی صحافی تا جتا سوج آتا ورندی ءِ ترسا ترجمان دفترخارجہ ڈاکٹر محمد فیصل پارے کہ بھارتی حکومت نا کنڈآن مقبوضہ کشمیر نا خصوصی حیثیت ءِ بدل کننگ آن پد وزیراعظم عمران خان غٹ آپشن تے کاریم اٹ اتنگ نا پارت کرینے۔ ترجمان پارے کہ بحیثیت مسلمان خوف ننا ڈکشنری ٹی اف، بھارت 27 فورری ءِ یات تخنگک۔ ننا موقف پیدوار ءِ کہ بھارت کشمیری تا ہیت ءِ بنے، پاکستان جموں و کشمیر نا بابت بھارت نا اسہ کنڈی گام گیج آتے مسترد کیک وخت اس کہ بھارتی حکومت ءِ قومی سلامتی کمیٹی نا فیصلہ غاتیان معلومدار کننگانے۔ پاکستان تینا پندار ہائی کمشنر ءِ بھارت آ مون تفک۔ اوپارے کہ کشمیر اقوام متحدہ نا سلامتی کونسل نا ایجنڈاغاٹے و اسہ متنازعہ ءُ علاقہ اسے۔ دانا حتمی فیصلہ یو این نا رداٹ منصفانہ و آزادانہ استصواب رائے نا کمک اٹ ہی مریک۔
