اسلام آباد۔ 29 جولائی (اے پی پی) وزیراعظم عمران خان پارینے کہ ننا جنگ حق و کانود نا بالادستی نا جنگ ءِ، ملک اٹی کانود نا حکمرانی برے تو غٹ ویل آک چٹرہ، زیات بھلو ڈوہ کروک آتے زیات آسراتی ملسا کرینے، ملک آ 24ہزار ارب روپئی نا وام تے ودفوک آتے جیل اٹی ٹی وی و اے سی ملک، غریب آتا اُراتیٹی ہم دا آسراتی اف، ننے اختہ مروک آ تپہ غاتے بڑزاہرفوئی ءِ، مسکوہی حکمرانی تا عیاشی تا سوب آن نزور تپہ اختہ مننگ ءِ، اسلامی تعلیمات آتا رداٹ اقلیت آتے پورو رکھ فراوان کننگک، قرآن نا حکم ءِ کہ کس اسے زور اٹ اسلام نا دنگ اٹ داخل کننگ مفک، پاکستان ءِ ریاست مدینہ نا اصول آتا رداٹ کینہ۔ اوداخیال آتا درشانی ءِ دوشنبے نادے آ ایوان صدر اٹی اقلیت آتا قومی دے انا بابت اسہ خصوصی ءُ دود اسے آن تران کرسا کرے۔ دود اٹی صدر مملکت ڈاکٹر عارف علوی، بنجائی وزیر مذہبی امور بین المذاہب ہم آہنگی نورالحق قادری و وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان تون اوار پارلیمنٹ نا باسک آک و اقلیتی برادری آن تعلق تخوک آ بندغ آک بھلو کچ اسے ٹی ساڑی ئسر۔ وزیراعظم عمران خان پارے کہ نن ملک ءِ ریاست مدینہ نا وڑآ اسہ پوسکن ءُ ریاست اس کننگ خوانہ، ریاست مدینہ نا بابت اسہ پیدوار ءُ ویژن اسے، غٹ چارہ کہ داڑے ہراخلقت اسلام نا پن آ دوکان تے جوڑ کرینو۔ اوپارے کہ پاکستان اسٹ انگا ملک ءِ ہرا اسلام نا پن آ جوڑ مس و ننکن ریاست مدینہ اسہ نمونہ اسے ہرا دے خواجہ ﷺ جوڑ کریسس۔ اونا پاننگ ئس کہ ریاست مدینہ نا مطالعہ ءِ کننگ آن بیدس پاکستان نا مسخت ءُ دوئی کننگ مفک، ریاست مدینہ نا اصل ویژن آن قوم ءِ معلومدار کینہ۔ وزیراعظم پارے کہ علامہ اقبال نا ویژن ننا مون آٹے۔ ریاست مدینہ پوسکن آ پاکستان کن اسہ ماڈل اسے نا حیثیت تخک، علامہ اقبال نا فلسفہ نا مطالعہ کین تو معلوم مریک کہ مدینہ نا ریاست نا اصول آتیا عمل کرسا ہی نن شون ہلنگ کینہ۔ وزیراعظم پارے کہ یونیورسٹی تیٹی نن ریاست مدینہ غا پی ایچ ڈی کرفینہ، دنیا نا شون ہلوک ملک آک ریاست مدینہ نا اصول آتے مون آ تخسا شون ہلکر۔ اوپارے کہ خواجہ 1400سال مست ریاست مدینہ نا پن آ پوسکن ءُ ریاست اس جوڑ کرے و تینا آخیریکو خطبہ ٹی اوفرمائفے کہ نن غٹ رنگ و نسل آن ایڑتر مرسا حضرت عادم ؑ نا اولاد اُن۔ وزیراعظم پارے کہ حضور اکرم ﷺ ریاست مدینہ نا بنداو ءِ اصول و کانود آ تخا و عدل و انصاف نا بابت اسہ مثال اس قائم کرے۔ اومیثاق مدینہ کرے، نجران آن بروک آ مسیحی برادری نا خلقت ءِ مسجد نبوی ٹی جاگہ تس، مسیحی برادری تون معاہدہ کرے و پارے کہ قیامت اسکان مسلمانک اوفتا عبادت گاہ تا رکھ ءِ کیرہ، ننے الس اٹی ریاست مدینہ نا سوچ ءِ ودی کروئی مریک، اقلیت آتون اوار غٹ خلقت نا یکجا مننگ آن ملک سوگو مریک، وزیراعظم پارے کہ قرآن پاک نا حکم ءِ کہ دین اٹی ہچ کس ءِ زوراکی اٹی اوار کننگ مفک، نیاڑی تتون زبردستی برام و اوفتے زبردستی اسلام اٹ داخل کننگ غیر اسلامی ءُ کاریم اسے، دابابت سندھ اٹی نن واقعہ غاتے بنسا کرینن۔ اوپارے کہ اسلامی تاریخ نا مطالعہ ءِ کین تو دا ہیت ءِ پہہ مرینہ کہ کس اسے زبردستی اسلام نا دنگ اٹ داخل کروک آ قرآن و سنت نا تعلیمات آتیان ناواقف ءِ۔ اوپارے کہ ریاست مدینہ ٹی خلیفہ وخت ہم یہودی شاری تا مقابلہ ٹی تینا مقدمہ ءِ باتسر و ہموڑے اقلیتی شاری تے بریبر نا حق دوئی ئس، وزیراعظم پارے کہ اینو نن اگہ ہرن تو بھلو بھلو بندغ ہرا برسراقتدار مسر ہرا صدر و وزیراعظم ہم مسر او تینا کرپشن آ عدالت آتے ٹی ہم تینے بے قصور ثابت کپسہ حالانکہ ای عدالت اٹی 7 دستاویز جمع کرفیٹ انتئے کہ ای پارٹی نا سروک و جوبدہ اُٹ، ہراخلقت دا ملک آ 10 سال اٹی 24ہزار نا وام تے ودفیر اوفتیان جواب طلب کین تو او اودے انتقامی کارروائی گوندرہ۔ اوپارے کہ اقلیتی برادری ءِ غٹ حق آتے تننگک۔ اوفتا عبادت گاہ تا رکھ ءِ کینہ، کرتارپور و ننکانہ صاحب نا سکھ آتے کن بھاز اہمیت ءِ، بابا گرونانک نا 585می سال دے انا وخت آ کرتارپور راہداری ءِ ملنگ نا نن ڈٹ اس کرین، سکھ آتے کرتارپور و ننکانہ صاحب اٹی مذہبی رسم آتا ادا کننگ کن پورو آسراتی و آسانی ایتنہ، اقلیت آتے کن ننے آن انتس کہ مس کننگک۔
