کراچی۔ 10 جولائی (اے پی پی) وزیراعظم عمران خان پارینے کہ پاکستان نا معیشتءِ داسہ متکن آ وڑوڈول آتیا چلیفنگ مفک، کاروباری برادری کن آسانی ودی کننگ خوانہ، ننا اولی اولیت نیزگاری نا چٹفنگ و معاشی عمل ءِ ترند کننگ نا ءِ ہراٹی کاروباری برادری نا کمک درکارءِ، کاروباری برادری شریدار مرسا حکومت تون اوار کاریم کے۔ اوداہیت ءِ بنجاایوان ہائے صنعت و واپار پاکستان (ایف پی سی سی آئی)، کراچی چیمبر آف کامرس اینڈ انڈسٹری(کے سی سی آئی) و آٹو موٹو سیکٹر نا ڈل اتون داڑے اوڑدہی ٹی گپ و تران کرسا پارے۔ ہرافک چارشنبے نادے آ داڑے اوڑتون اوڑدہی کریر۔ اوڑدہی ٹی گورنر سندھ عمران اسماعیل، وزیر بحری امور علی زیدی، بنجائی وزیر حماد اظہر، وزیر آبی وسیلہ فیصل واوڈا، سلاہکار واپار عبدالرزاق داؤد، سلاہکار خزانہ ڈاکٹر عبدالحفیظ شیخ، سلاہکاراصلاحات ڈاکٹر عشرت حسین، چیئرمین ایف بی آر سید شبر زیدی، چیئرمین بورڈ آف انویسٹمنٹ سید زبیر حیدر گیلانی و گورنر اسٹیٹ بینک ڈاکٹر رضا باقر ئسک ساڑی ئسر۔ ایف پی سی سی آئی نا ڈل اٹی ایس ایم منیر، داروخان اچکزئی، مرزا اختیار بیگ، غضنفر بلور، زبیر طفیل، طارق حلیم، خالد طواب و سید مظہر علی ناصر ئسک اوار ئسر۔ کے سی سی آئی ڈل اٹی سراج قاسم تیلی، جنید اسماعیل مکدہ، خرم شہزاد، زبیر موتی والا، ہارون فاروقی، انجم نثار، ہارون آگر، شمیم احمد فرپوو علی جی جی ئسک اوار ئسر۔ آٹوموٹو سیکٹر نا ڈل اٹی ٹویوٹا انڈس موٹرز، پاک سوزوکی موٹرز، ہینوپاک موٹرز، اسوزوموٹرز، ماسٹر موٹرز، اٹلس ہنڈا موٹرز وفاء موٹرز نا نمائندہ غاک ساڑی ئسر۔ اوڑدہی ٹی ڈل آک خراج نظام اٹی اصلاحات، کبینی آ کنٹرول، سمگلنگ نا توننگ، کاروبار اٹی آسانی، زرکاری ءِ مون آ دننگ، روزگار نا وارخواہی تے ودفنگ، و محصولات آتے ٹی ودکی نا بابت سلاہ تسر۔ داوخت آ گپ و تران کرسا وزیراعظم پارے کہ اونا کراچی نا دورہ ءِ کننگ نا مسخت ہندادے کہ کاروباری برادری نا ویل آتے ایسر کیو۔ کنا مچ آ معاشی ٹیم داڑے ساڑی ءِ تانکہ ویل آتا دمدستی ایسر اس کشنگے۔ اوپارے کہ حکومت اوفتے کن آسانی ودی کننگ خواہک، داسہ پاکستان نا معیشت ءِ متکن آ وڑوڈول نا رداٹ چلیفنگ مفک۔ وزیراعظم پارے کہ ننا اولیت نیزگاری نا چٹفنگ و معاشی عمل ءِ ترند کننگ نا ءِ ہراٹی کاروباری برادری نا کمک درکار ءِ، کاروباری برادری پارٹنر مرسا حکومت تون اوار کاریم کے۔
