اسلام آباد۔ 26مئی (اے پی پی) پاکستان وچین سی پیک نا رداٹ تین پہ تینی سرجزآتے ٹی ودکی کن چندی ڈٹ آتیا کمکاری نا 5 دستاویز آتیا دستخط کرینو۔ دستخط نا دود داڑے اسلام آباد اٹی اڈ ہلک، وزیراعظم عمران خان و چین نانائب صدر وانگ کشان دستخط نا دود اٹی ساڑی ئسر۔ داوخت آ وزیر خارجہ شاہ محمود قریشی، بنجائی وزیر ڈٹ بندی خسرو بختیار، سلاہکار خزانہ ڈاکٹر عبدالحفیظ شیخ و چینی ڈل ہم ساڑی ئس۔ دا دود چین نا نائب صدر وانگ کشان نا مسہ دے انا دورہ نا بشخ اسے، ہرا بڑزکو کہولی ڈل اتون اوار یک شنبے نادے آ داڑے سرمسنے۔ ہڑتوم آ ملک آک کشاری کمکاری آ اسہ فریم ورک معاہدہ سے آ دستخط کریر۔ چینی نائب وزیر ژانگ تاولن و وزارت فوڈ سیکورٹی نا سیکرٹری ڈداکٹر محمد ہاشم پوپلزئی معاہدہ غا دستخط کریر۔ ایف ایم ڈی فری زون ہراٹی چین نا جنرل ایڈمنسٹرین کسٹم و اینیمل کوارنٹائن ڈیپارٹمنٹ وزارت نیشنل فوڈ سیکورٹی و ریسرچ پاکستان نا نیام اٹ ویکسینیشن نا اسہ یات داشت اسے آ دستخط کننگا۔ پاکستان اٹی چین نا سفیر یاؤ جنگ و ڈاکٹر ہاشم پوپلزئی دستاویز آتیا دستخط کریر۔ پاکستان چین اکانومک کارپوریشن ایگریمنٹ آ چین نانائب وزیر ڈینگ بوکنگ و پاکستان نا سیکرٹری اقتصادی امور ڈویژن نور احمد مفاہمتی یات داشت آدستخط کریر۔ چینی نائب وزیر ڈینگ بوکنگ و سیکرٹری اقتصادی امور ڈویژن اسہ تین پہ تینی تبادلہ نا یات داشت اسے آ دستخط کریر۔ ہڑتوم آ سنگت ملک آک سی ایم ای سی و حکومت بلوچستان و لسبیلہ ٹی پوسکن آ کشاری جامع ڈویلپمنٹ لسبیلہ یونیورسٹی مفاہمتی یات داشت آ دستخط کریر۔ دستاویز آتیا دستخط چین نا سی ایم ای سی نا نائب صدر و لسبیلہ یونیورسٹی نا وائس چانسلر پروفیسر ڈاکٹر دوست محمد بلوچ و گورنر بلوچستان نا پی ایس ئسک کریر۔
