اسلام آباد۔ 26مئی (اے پی پی) چین نا نائب صدر وانگ کشان یک شنبے نادے آ صدر مملکت عارف علوی تون ایوان صدر اٹ اوڑدہی کرے۔ صدر مملکت چینی نائب صدر ءِ چین نا 70 می سال دے آ مبارکبادی تس۔ اوپارے کہ پاکستان و چین متکن، تاریخی و دودوربیدگی تعلقداری تیٹی گنڈوک ءُ، ”آل ویدر سٹریٹجک کوآپریٹو پارٹنر شپ“ ءِ ادارہ جاتی و سوگو السی مخ تفی دوئی ءِ۔ اوپارے کہ ہڑتوم آ ملک آک اسہ ایلو نا چندی معاملہ غاتیا مخ تفی ءِ کیرہ۔ وزیراعظم عمران خان نا اپریل 2019 ء نا دورہ نا ذکر ءِ کرسا صدر مملکت پارے کہ دا دورہ آن تین پہ تینی تعلقداری تا سوگوی ءِ سوگوی ملانے۔ صدر مملکت چینی صدر ژی جن پنگ نا بیلٹ اینڈ روڈ انا گام گیج نا ستاءِ کرے۔ اوپاکستان نا قومی شونداری ٹی سی پیک نا اہمیت نا ستاءِ کرے و دانا زوت پورو مننگ آ زور شاغا۔ صدر مملکت معاشی و واپاری تعلقداری تے پین ودفنگ نا اعادہ کرے۔ ہڑتوم آ ملک آتا نیام اٹ ودوک آ دودوربیدگی نا امور آ است جمی نا درشانی ءِ کننگا۔ صدر السی کہول آ تعلقداری تے تین پہ تینی وڑاٹ پین ودفنگ و اوفتے ایلو بشخ آتسکان ودفنگ آ زور شاغا۔
