لاہور۔ 26 مئی (اے پی پی) فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (ایف آئی ای ڈی ایم سی) نا چیئرمین میاں کاشف اشفاق پارینے کہ چین نا نائب صدر وانگ کی شان نا دورہ پاکستان آن اقتصادی کمکاری نا پوسکن ءُ دور اس بناکیک و دا ہڑتوم آ سنگت ملک آتا نیام اٹ ہڑتوم آ کنڈآتا تعلقداری تے پین سوگو و مستحکم کننگ اٹ اہم ءُ کڑد اس ادا کیک۔ یک شنبے نادے آ داڑے ذرائع ابلاغ تون گپ و تران کرسا میاں کاشف اشفاق پارے کہ وزیراعظم عمران خان نا متحرک سرکڑدہ ہی ٹی حکومت درملکی زرکاری کن دوستانہ چاگڑد اس فراوان کرینے۔ چین نا نجی و سرکاری بشخ اکن زرکاری خاص وڑاٹ توانائی، کشت وکشار، لائیو اسٹاک و آئی ٹی نا بشخ آتے ٹی بھلو وارخواہی اس ارے۔ چین پاکستان نا قدرتی وسیلہ غاتا پٹنگ اٹ ہم کمک فراوان کیک ہراڑان قومی معیشت ءِ گچین کننگ تون اوار اوار روزگار نا وارخواہی ہم فراوان مریک۔ اوپارے کہ دا دورہ ٹی پک مروک آ غٹ معاہدہ غاتیا عملدرآمد بے کچ اہمیت تخوک مریک۔ اوپارے کہ دا بے کچ المی ءِ کہ چین پاکستان اٹی پوسکن آ ٹیکنالوجی ءِ گدریفے تانکہ ہندی وسیلہ غاتیان پبی فائدہ ہرفنگ مرے۔ میاں کاشف اشفاق دا اومیت نا درشانی ءِ کرے کہ دا دورہ واپار نا کچ ءِ ودفنگ و اونا ہدف آتے پورو کننگ اٹ ہم کمکار مریک۔
