اسلام آباد۔ 25مئی (اے پی پی) السی جمہوریہ چین نا نائب صدر وانگ کی شان پگہ (یک شنبے نادے آن) پاکستان نا دورہ ءِ کیک۔ چین نا نائب صدر وانگ کی شان 13می نیشنل پیپلز کانگریس و مرکزی فارن افیئرز کمیشن نا باسک ءِ۔ مرکزی فارن افیئرز کمیشن چین نا کمیونسٹ پارٹی نا اہم ءُ ادارہ اسے۔ ترجمان دفتر خارجہ نا رداٹ السی جمہوریہ چین نا نائب صدر وانگ کی شان نا دورہ پاکستان آن ہڑتوم آ ملک آتا نیام اٹ بڑزکو کہول انا ہڑتوم آ کنڈآتا رابطہ غاتا اسہ کڑی اسے۔ ہراٹی وزیراعظم عمران خان نا نومبر 2018 ء نا دورہ چین و ولدا اپریل 2019 ء ٹی دورہ چین و ارٹ میکو بیلٹ اینڈ روڈ فورم اٹی شرکت آن پد ترندی آ بسنے۔ ترجمان پارے کہ تینا دورہ ٹی نائب صدر وانگ کی شان صدر مملکت عارف علوی و وزیراعظم عمران خان تون جتا جتا اوڑدہی کیک۔ اونا دورہ ٹی چندی بشخ آتے ٹی ہڑتوم آ ملک آتا نیام اٹ مفاہمت نا دستاویز و معاہدہ غاتیا دستخط مریک۔ چینی نائب صدر نا دورہ غان پاکستان و چین نا نیام اٹ سدابہار و آزموندہ سنگتی نا اہمیت تالان مریک۔ اونا دورہ پاکستان آن ہڑتوم آ ملک آتا نیام اٹ چندی بشخ آتے ٹی کثیر الجہتی تعلقداری تے پین مون آ دننگ دوئی مریک۔

متعلقہ مضامینمصنف کی طرف سے مزید