اسلام آباد۔ 24 مئی (اے پی پی)سپیکربنجاہی اسمبلی اسد قیصر ءَ گوشت کہ پاکستان ءُُ ایران ءِ مہلوک ءِ وشھالی ءُ خطہ ءِ دیمروئی ءِ ھاترا دوئیں ملکانی میان ءَ نزیکیں کمک الم انت،ناشرکاری ءُُ بیم کاری دمگ ءِ سلامتی ءِ ھاترا مستریں حطرہ انت،ایشی ھلاسی ءِ ھاترا یکجاھیں کوشست کنگ بنت،آہاں اے گپ ایرانی دری کارانی وزیر ڈاکٹر محمد جواد ظریف ءِ گوما گپ ءُُ تران کنان ءَ کتگ ات۔آہاں جمعہ ءَ ادا پارلیمنٹ ہاؤس ءِ تہ آئی ءَ گوں گند ءُُ نند کتگ۔گند ءُُ نند ءِ تہ دودیمی سیادی،دمگ ءِ جاورھال ءِ ھوار وت مہ وتی اندوہناکی ءِ معاملیانی سرا ھیال ریچی کتگ۔ سپیکر قومی اسمبلیءَ گوشت کہ پاکستان ایران ءَ گوں دوستی ءُُ ہمساھگی ءِ لازوال رھوت ءَ بندوک انت،پاکستان ایران ءَ گوں دمگی دیمروئی ءُُ دگہ جیڈھانی گیشینگ ءِ ھاترا دودیمی کمک ءَ را پراھی ءِ واھگدار انت۔آہاں گوشت کہ ناشرکاری ءُُ بیم کاری دمگ ءِ ھاترا مزنیں ھطرہ انت،ایشی ءِ ھلاسی ءِ ھاترا یکجاھیں کوشستانی ضلورت انت، دودیمی سیادی ءَ را پراھی دیگ ءِ تہ پارلیمانی سفارتکاری ھاسیں کرد ادا کن ایت۔ اسد قیصر ءَ گوشت کہ پاکستان ایران ءِ ھوار دراھیں ھمساھگ ملکاں گوں بروبری ءِ تبک ءَ وشیں سیادی ءَ لوٹگ انت ءُُ دراھیں معاملہارا گپ ءُُ تران ءِ وسیلگ ءَ حل کنگ لوٹگ انت۔آہاں گوشت کہ دوئیں ملکانی مہلوک ءِ وشھالی ءُُ دمگ ءِ دیمروئی ءِ ھاترا نزیکیں کمک الم انت۔ایرانی ہمکارڈاکٹر جواد ظریف ءَ سپیکر بنجاہی اسمبلی ءِ نیمگا چہ ھیر سگالی ءِ جوزگ ءِ سرا آہانی منت گپتگ انت ءُُ دوئیں ملکانی دمگی ءُُ میاں اوستمانی معاملہانی سرا یک وڈیں گپ ایرکنگ انت ءُُ دوئیں ملکاں گرانیں وھد ءَ یک دومیگ ءَ گوں پج ءَ اوشتاتگ انت۔
