سوہاوہ۔ 05مئی (اے پی پی) وزیراعظم عمران خان پارینے کہ معاشی تنکی و جوان و خراب حالیت آک قوم تیا بریرہ کارہ، ولے نظریہ کائے تو قوم انا ہچ ءُ آخبت اس سلپک، القادر یونیورسٹی ٹی پوسکن آ سائنسی علم اتون اوار اوار روحانیت نا تعلیم تننگک، داڑے اسلام نا تاریخ و صوفی تا کڑد آ مروک آ پٹ وپول آن دنیا ٹی اسلام نا برخلاف چست کروک آ توار و رسول ﷺ نا شان اٹی گستاخی نا ورندی ءِ تننگک۔ دے ٹکی پاکستان نظریہ غان اینک مننگ، انصاف و حق ملیپننگ نا سوب آن ننے آن جتا مس، ریاست مدینہ نا بنداو عدل و انصاف آ مبنی ئس، راج انا نیامی و نزور تپہ غاتا فلاح نا زمواری دنیا ٹی غٹ آن مست ہندا ریاست ہرفے، اینو یورپ دا اصول آتیا کاربند ءِ۔ او یک شنبے نادے آ داڑے سوہاوہ ٹی القادر یونیورسٹی نا بنداوءِ تخنگ نا دود آن تران کریکہ۔ داوخت آ وزیراعلیٰ پنجاب عثمان بزدار، بنجائی وزیر آتون اوار الس نا بھلو کچ ہم ساڑی ئسر۔ وزیراعظم عمران خان پارے کہ ہراتم 23 سال مست او سیاست نا بناءِ کریسس تو اونا ذہن اٹی دا گڑا ئس کہ اودے موقع ملا تو او پاکستان نا ورناچین ءِ پاکستان ءِ جوڑ کننگ نا مسخت و نظریہ غان معلومدار کیک۔ قیام پاکستان نا پد اٹ اسہ اسلامی فلاحی ریاست اسے نا نظریہ ئس۔ علامہ اقبال ہرا تصور ءِ تسوسس او اسلامی فلاحی ریاست، ریاست مدینہ نا وڑآ ئس۔ وزیراعظم پارے کہ دے ٹکی پاکستان نظریہ غان اسہ کنڈ مننگ نا سوب آن ننے آن جتا مس، داٹی بھارت نا نیام تمنگ تون اوار ایلو عوامل آک ہم ئسر۔ ولے ہموجاگہ نا خلقت ءِ دیکی پاکستان آنبار حق ملتوکہ، اوفتے انصاف ملتوکہ۔ اوپارے کہ اگہ نن ملک ءِ پدی دا نظریہ غا اتون ہراڑا دانا قیام ءِ عمل اٹ اتنگاسس، واک انا زور آ ملک ءِ یکجا تخنگ مفک۔ بلکن دا الس نا سوب آن یکجا مریک انتئے کہ ریاست شاری تے انصاف ایتک۔ اوفتا گرج آتے پورو کیک۔ وزیراعظم پارے کہ ریاست مدینہ نا بنداو عدل و انصاف آ ئس۔ ہموڑے طاقتور آن مال ہلسا نزور آ خڑچ کننگاکہ،نزور، ضعیف، جنوزان تا زمواری ءِ دنیا نا تاریخ اٹی اولیکو وار ریاست مدینہ ہلکوسس، ہرا اصول آتیا مدینہ نا ریاست جوڑ مس یورپ ہمو عدل و انصاف و اصول آتیا روان ءِ۔ مدینہ نا ریاست اٹی میرٹ اہم ءُ جز اس ئس۔ داڑے اقلیت آتون اوار ہر اسٹ ءِ بریبر حق دوئی ئس۔وزیراعظم پارے کہ اینو فاٹا و بلوچستان نا گڑاس علاقہ غاتے ٹی الس نا حالیت زار بے کچ خراب ءِ، سندھ انا تہہ ٹی 70 درسد خلقت نیزگاری نا لکیر آن شیف زند ءِ تیر کننگ ءُ۔ ننا باوہ و پیرہ غاک پاکستان نا قیام انا وخت آ ہرا وعدہ غاتے کریسر دا ہمو ریاست اف۔ 23سال مست سوچاسٹ کہ اگہ اللہ کنے موقع تس تو نظریہ پاکستان، پاکستان نا قیام نا مسخت آن ورناتے معلومدار کیوہ۔ وزیراعظم پارے کہ نظریہ غان ہی لیڈر جوڑ مریک ہراتم نظریہ ہی مفک تو لیڈر ہمہ جوڑ مریک۔ 70سال اٹی اخہ لیڈر بس، ذوالفقار علی بھٹو آن پد ہر لیڈر پاکستان نا الس نا خیرخواہ مسکہ بسکہ، ولے ہراتم ہناکہ تو مچ آ دنیا ٹی اونا میرات آک مسرہ۔ وزیراعظم پارے کہ دا یونیورسٹی دا مسخت کن جوڑ کننگانے کہ ورناتے پاکستان ءِ جوڑ کننگ نا مسخت آن معلومدار کننگے۔ پاکستان داخاطران جوڑ مسوسس کہ ہندوستان اٹی رہینگوک آ غٹ شاری تے بریبر نا شاری امنا کننگتوکہ۔ پاکستان نا بنداو مدینہ نا اسلامی فلاحی ریاست آ تخنگاسس۔ مدینہ نا ریاست نا او ہرا اصول آک ئسر دابارواٹی دا یونیورسٹی ٹی ریسرچ مریک۔ ہراوڑ نیزگار انگا مسلمانک دنیا نا امامت ءِ کریر اوڑا پٹ وپول مریک۔ وزیراعظم پارے کہ القادر یونیورسٹی ٹی 35 درسد ہونہار چناتے سکالر شپ تننگک وخت اس کہ ایلو 65 درسد پیسہ ترسا تعلیم دوئی کیرہ۔ آخبت نا بھلو بھلو لیڈر داکان پیش تمک۔ وزیراعظم پارے کہ بدبختی اٹ اینو پگہ نا سیاستدان تیٹی تینا پٹواری یا تھانیدار تخفنگ نا است خواہی یا شونداری بجٹ نا طلب مریک۔ وزیراعظم پارے کہ دا اسہ پورو ءُ پرائیویٹ ءُ یونیورسٹی اسے داڑکن نمل یونیورسٹی نا وڑآ خلقت آن فنڈ یکجا کننگانے، دادے نمل یونیورسٹی آنبار چلیفینہ۔ پورو میرٹ آ مچ آ پاکستان آن ذہین چناتے داڑے تعلیم تننگک وخت اس کہ دانا کیمپس آتے زوت ایلو شار تیٹی ہم دینہ۔
