لاہور۔ 04مئی (اے پی پی) وزیراعظم عمران خان نا کماشی ٹی ہفتہ نادے آ اینٹی کرپشن اسٹیبلشمنٹ پنجاب نا دیوان اس اڈ ہلک، دیوان اٹی وزیراعلیٰ پنجاب سردار عثمان بزدار، خصوصی کمکار وزیراعظم شہزاد اکبر ئسک بشخ ہلکر۔ چیف سیکرٹری پنجاب، آئی جی پنجاب، ڈی جی اینٹی کرپشن اسٹیبلشمنٹ پنجاب و ڈائریکٹر ز اینٹی کرپشن اسٹیبلشمنٹ پنجاب دیوان اٹی ساڑی ئسر۔ ڈی جی اینٹی کرپشن اسٹیبلشمنٹ پنجاب اعجاز حسین شاہ دیوان ءِ اینٹی کرپشن اسٹیبلشمنٹ پنجاب نا مشن، انتظامی پنجر، کانودی فریم ورک، عملداری نا وڑوڈول، ہیومن ریسورس، ادارہ ءِ مالی بدعنوانی تا ریکوری و دزگیری تا بابت داوخت اسکان دوئی مروک آ سرسہبی تیا حوال تس و آخبت اٹی ادارہ جاتی لائحہ عمل ءِ پین جوان کننگ، خاص کر افرادی واک انا کمتی ءِ پورو کننگ و وائٹ کالر کرائم ءِ کنٹرول کننگ اٹ کسبی چاہنداری ءِ ودفنگ نا بابت آفیسر آتا تربیتی کورس انا سلاہ پیش کرے۔ وزیراعظم عمران خان اینٹی کرپشن اسٹیبلشمنٹ پنجاب نا آفیسر آتے پارے کہ نم کسبی فرض ایہون ءُ فرض اس اف، بلکن ملک انا ساڑی حالیت آتے ٹی دااسہ جہاد اسے۔ اللہ تعالیٰ ننا ملک ءِ بے پناہ وسیلہ تسنے۔ ولے کرپشن نا ناسور ننا ملک ءِ بے حد نسخان تسنے۔ مستین اٹی ہراوڑنا کرپشن ننا ملک اٹی کننگا، اونا سوب آن اینو نن معاشی بدحالی نا گواچی و وام ہلنگ آ بیوس مسونن، وزیراعظم پارے کہ کرپشن نا سوب آن نن ڈیہہ نا ایلو ملک آتیان پدی سلیسونن و ننا بروک آ چین تا آخبت داؤ آ لگا۔ اوپارے کہ نما اولیکو اولیت بھلا ڈوہدار تا برخلاف ایکشن ہلوئی بایدے مرے انتئے کہ اوفتا سوب آن محروم و اختہ مروک آ تپہ غاک مشکل آتے ٹی ءُ۔ وزیراعظم عمران خان اینٹی کرپشن آفیسر آتے بے خوف و بے زورانا تینا فرض ءِ پورو کننگ نا پارت کرسا پارے کہ اگہ آفیسر آتے فریشانی اس یا ویل مون تروک مرے تو او آفیسر آتون سلرہ۔
