لاہور۔ 04مئی (اے پی پی) وزیراعظم عمران خان پارینے کہ دنیا نا تاریخ ہزگار ءِ آخا قوم انا خذمت کروک آتے یات تخک، گلاب دیوی ہسپتال، گنگارام ہسپتال ءِ جوڑ کروک آتے قوم یات تخک، پیسہ جوڑ کروک آک نرنگ ءُ، کس اس لندن آ نرا، ہرا تینا قوم و ملک اکن گڑاس کیک قوم اودے یات تخک، کنا زند انا اصولءِ کہ ای وخت اس ہم پدی ہپرہ، مستین ہیل کننگ کن مریک۔ داخیال آتا درشانی ءِ او ہفتہ نادے آ داڑے ایچی سن کالج اٹی الیکٹرانک کرکٹ سکور بورڈ انا بنائی دود آن تران کرسا کرے۔ وزیراعلیٰ پنجاب سردار عثمان بزدار، گورنر پنجاب چوہدری محمد سرور، وزیراعظم نا خصوصی کمکار اطلاعات و نشریات فردوس عاشق اعوان تون اوار صوبائی وزیر آک و ایلو فک ہم داوخت آ ساڑی ئسر۔ وزیراعظم عمران خان پارے کہ مستین بیرہ ہیل کننگ کن مریک، اللہ انسان ءِ اشرف المخلوق جوڑ کرینے و نمے ہمو وارخواہی تے تسنے ہراپین مخلوق اسے تننگ تنو، ای داڑے بسٹ کنے بھاز خوشی مس، کنکن دا شرف نا ہیت اسے کہ ای داکان خوانانٹ، نم خوش قسمت اورے نمے جوان ءُ کرکٹ گراؤنڈ اس ملا، جوان تعلیم نا آسراتی دوئی ءِ، ملک انا نیمہ آبادی نیزگاری نا لکیر آن شیف زند ءِ تیر کننگ ءُ۔ وزیراعظم پارے کہ ایچی سن کالج اٹی گوازی کروک آتے ہروڑنا آسراتی ملنگ ءِ ولے داغٹ آن پد ہم او گلی کوچہ غاتے ٹی گوازی کروک آتا مقابلہ ءِ کننگ کتورہ انتئے کہ اوفتے ٹی گوازی کننگ نا ہرا جوزہ و جنون مریک او پین کس اسے ٹی اف۔ اوپارے کہ غٹ آن زیات پیسہ نمے آ خڑچ مننگ ءِ ہنداخاطران نمے آ غٹ آن زیات زمواری مریک، نمے بھلو ویژن اس تخوئی ءِ، نمے سجفوئی ءِ کہ ننے تینا ملک اکن انت کروئی ءِ، نمے بھلن مروئی ءِ، ہمو بھلا ہرا تینا ملک و قوم انا بارواٹ سجفے، ہرا تینا قوم اکن گڑاس کننگ نا عزم تخے قوم اودے مدام یات تخک۔ وزیراعظم پارے کہ دنیا نا تاریخ ہزگار ءِ آخا قوم انا خذمت کروک آتے یات تخک۔ عظیم انگا بندغ آک پیسہ کننگ آن آخا عظیم زمواری تے پورو کننگ آن مریرہ، قائداعظم ءِ رہینگوک آ دنیا اسکان اونا گچین سوچ و خذمت آتا سوب آن یات تخنگک۔
