لاہور۔ 4مئی (اے پی پی) وزیراعظم عمران خان پارینے کہ ننا تاریخی میرات بروک آ چین تیکن بھاز بھلو تاریخ اسے، ہرسال تینا بجٹ اٹی تاریخی میرات ءِ رکھ کننگ کن خصوصی بایدے فنڈ تخنگے، یورپ تون اوار مچ آ دنیا ٹی تاریخی ہند آتے رکھ کننگک وخت اس کہ پاکستان اٹی ننا تاریخی ہند آتا رکھ اکن مستین اٹی ہچ ءُ چکار اس کننگتنے،اللہ تعالیٰ پاکستان ءِ قدرتی زیبائی آن مالامال کرینے، ننا اخس کہ تاریخی میرات ءُ اوفتے رکھ کننگ کن گچین گام گیج چست کینہ۔ داخیال آتا درشانی ءِ او شاہی قلعہ لاہور اٹی والڈ سٹی اتھارٹی لاہور نا کنڈآن اڈ ہلوک آ دود آن تران کرسا کرے۔ وزیراعظم پارے کہ مستین اٹی پاکستان نا تاریخی میرات آ چکار کننگتنے پیشن نا ملک آن سیل و سواتیک پاکستان نا تاریخی ہند آتے ہُننگ کن بسرہ ولے پاکستان اٹی خلقت ءِ دُن انگا جاگہ غاتا بارواٹ ہچ ءُ معلومداری اس الوکہ، ننا تاریخی میرات بروک آ چین تیکن بھاز بھلو تاریخ اسے کہ نن انت ئسن ولے نن تینا تاریخی میرات ءِ رکھ کننگ کن ہچ ءُ گام گیج اس کتون۔ عمران خان پارے کہ پاکستان اٹی نن ٹورازم اٹی مالی وڑاٹ بھاز نسخان کرینن، ترکی کون آ ملک آتے ٹی ٹورازم آن سال اٹی 40 ارب کٹیا کننگ ءِ ملائیشیا کون آ ملک ہراڑتون تاریخی میرات اف، اوکان پد ہم تینا ٹورازم آن 20 ارب ڈالر سال اٹی کٹیا کننگ ءِ۔ ننا ملک اٹی ٹورازم کن بھاز بھلو وارخواہی ارے داسہ حکومت عملی گام گیج کرسا ٹورازم ٹاسک فورس ءِ جوڑ کرینے۔ ہراٹی موہن جوداڑو آن ہلیس تاریخی میرات ہرافتے ٹی متکن آ ماڑیک اوارو اوفتے نن ٹورازم نا مون آ دننگ کن کاریم اٹ اتینہ۔ وزیراعظم ڈائریکٹر جنرل والڈ سٹی اتھارٹی لاہور کامران لاشاری نا تاریخی میرات آتے رکھ کننگ کن چست کروک آ گام گیج آتا ستاءِ کرے۔ داکان مست ڈائریکٹر جنرل لاہور والڈ سٹی کامران لاشاری وزیراعظم ءِ لاہور اٹی تاریخی میرات آتے رکھ کننگ نا بابت کروک آ گام گیج آتیا سرجم حوال تس۔
