اسلام آباد۔29اپریل (اے پی پی) مزن وزیر عمران خان ءِ چین ءِ 4روچی ترء ُ تاب سرجم بوتگ، مزن وزیر ءَ چین ءِ صدر شی جن پنگ ءِ دعوتءِ سرءَ دومی بیلٹ اینڈ روڈ فورم ء ُ بیجنگ انٹرنیشنل ہارٹیکلچر نمائش 2019ءِ بُنگیجی مراگشءَ ہوار بوتگ۔ دری کارانی کارگس ءِ جارچین ءِ نیمگءَ چہ دوشمبے ءِ روچءَ جاری جارءِ ردءَ مزن وزیر عمران خانءَ 25تاں 28اپریلء َ چین ءِ سرکاری ترء ُتاب کتگ۔ مزن وزیر ءَ 26اپریل ءَ بیلٹ اینڈ روڈ فورم ءِ بُنگیجی مراگشءَ گوں تران کتگ۔ آئیءَ چینی صدر شی جن پنگ ءِ نیمگءَ چہ پہ میاں اوستمانی ر اہشونانی شرپءَ داتگیں شپ ءِ نان ءَ ہوار بوتگ۔ 27اپریل ءَ مزن وزیر ءَ میاں اوستمانی ءِ گول میز کانفرنس ءِ اولی سیشن ءَ گوں ہم تران کتگ۔ اے گرد میز کانفرنس ءِ سرحال ”نزیکی ءَ گیش کنگء ُ دیمروئی ءِ نوکیں موہ درگیجگ“ بوتگ۔ وتی بیان ءَ مزن وزیر ءَ بیلٹ اینڈ روڈ کمک ءِ ھاترءَ 4نوکیں دمگانی گپ کتگ۔ مزن وزیر ءَ چینی صدر شی جن پنگ ء ُ مزن وزیر لی کی چیانگ ءَ گوں 28اپریل ءَ گندء ُ نندکتگ۔ اے گندء ُ نندءَ دوئیں نیمگءَ چہ سی پیک ءَ ہوار دونیمگی کمک ءِ تپاسی کتگ۔ دوئیں نیمگءَ حاسیں دمگی ء ُ میاں او ستمانی کارانی سرءَ حیالء ُ لیکہ درشانی کتگ۔ بیلٹ اینڈ روڈفورم ءِ موہءَ مزن وزیر ءَ تاجکستان، ازبکستان، مصر، ملائیشیا، ایتھوپیا ء ُ جمہوریہ کرغزءِ میاں اوستمانی راہشوناں گوں گند ء ُ نندء ُ گپ ء ُ تران کتگ۔
