اسلام آباد۔ 29اپریل (اے پی پی) صدر مملکت ڈاکٹر عارف علوی پارینے کہ قومی احتساب بیورو نا ملک آن کرپشن نا چٹفنگ اٹی اہم ءُ کڑد اسے، وڈی خور عنصر آتا حوصلہ شکنی کن بے پرخ احتساب وخت انا گرج ءِ۔ اوداہیت ءِ دوشنبے نادے آ چیئرمین نیب جسٹس (ر) جاوید اقبال تون گپ و تران کرسا پارے ہرا ایوان صدر اٹی اوڑتون اوڑدہی کرے۔ چیئرمین نیب صدر مملکت ءِ تینا ادارہ نا سالانہ رپورٹ 2018 ء ءِ ہم پیش کرے۔ صدر مملکت پارے کہ وڈی خوری آ اودے ہمیشہ گڑتی مسنے انتئے کہ دا لعنت ملک انا معیشت و ادارہ غاتے بھس کرینے۔ او دا ہیت آ زور شاغاکہ ملک انا شونداری ءِ المی کننگ کن وڈی خوری ءِ ماس کش کننگ بے کچ اہم ءِ۔ اوپارے کہ حکومت نا مشن پاکستان ءِ وڈی خوری آن پاک کننگ ناءِ۔ صدر نیب انا کارکڑدآ است جمی نا درشانی ءِ کرسا پارے کہ نیب اسہ آجوءُ ادارہ اسے و اونا کارکڑدآن پاکستانی الس نا اوڑا پت ءِ پین سوگوی ملک۔
