استنبول۔ 30اپریل (اے پی پی) آزاد جموں و کشمیر نا صدر سردار مسعود خان پارینے کہ اگہ جہانی برادری مقبوضہ کشمیر اٹی انسانیت نا برخلاف ڈوہ تیان بھارت ءِ توننگ کپک تو اودے دا ڈوہ تیٹی اوار تکنگک۔ کشمیر نا مجبور الس نا حق اٹی ترکی نا توار غٹ آن بڑز و جتا ءِ، ہراڑکن آزاد کشمیر و مقبوضہ کشمیر نا الس ترک حکومت، خاص وڑاٹ صدر طیب اردوان نا منت وار ءُ ہرااسلام آباد، دہلی، اسلامی کمکار تنظیم و دنیا نا ہر پلیٹ فارم آ دوٹوک و غیر مہم وڑاٹ کشمیری الس نا حق خودارادیت نا مخ تفی ءِ کرینے۔ داہیت ءِ صدر آزادکشمیر استنبول ذائم یونیورسٹی ٹی مسہ دے ئی جہانی فلسطین کانفرنس نا بنائی دیوان اٹی مہمان خاص نا حیثیت اٹ تران کرسا کرے۔ اوپارے کہ پاکستان و آزاد کشمیر نا الس فلسطین نا آجوئی و آزاد فلسطینی ریاست کن ہموجوزہ ءِ تخرہ ہرا او کشمیر نا آجوئی و کشمیری تا حق خودارادیت کن تخرہ۔ کشمیر و فلسطین نا جھیڑہ غاتیٹی باہم مماثلت نا ذکر ءِ کرسا صدر آزاد کشمیر پارے کہ ہڑتوم آ ڈیہہ تا الس نا حق آجوئی و حق خودارادیت آن نمن مرسا اوفتے تینا ہی گل زمین اٹی اجنبی کننگانے۔ اوپارے کہ فلسطین نا ویل و کشمیر نا ویل انا ایسر مفننگ ہراڑے جہانی برادری نا پیشانی آ مون ءُ ٹک اسے ہموڑے جہانی آرڈر نا سرسہبی کن ہم اسہ چیلنج اسے نا حیثیت تخک۔ کشمیر نا بارواٹی بھارت نا دا دعوی ءِ کہ دا بھارت نا المی ءُ بشخ اسے حقیقت آن بالکل برعکس ءِ۔ حقیقت دادے کہ تدوک آ ہفتاد سال آن بھارت کشمیری تا خون و اوفتے ٹھپی کننگ ءِ۔ کشمیری زالبول آتا بے حرمتی ءِ کننگ ءِ و اودا غٹ ءِ داخاطران کننگ ءِ کہ کشمیریک بھارت آن خواست کننگ ءُ کہ او اوفتا گل زمین ءِ خورک کے و تینا فوجی کوزہءِ چٹفے و کشمیری تے اقوام متحدہ نا قرارداد و تینا است خواہی تا رداٹ تینا آخبت نا فیصلہ ءِ کننگ نا موقع ایتے۔ داسہ جہانی برادری نا اسہ بھاز بھلو بشخ اس ہم تینا خاموشی ءِ پرغسا دا امنا کننگ آ بیوس مسنے کہ مقبوضہ جموں و کشمیر اٹی بھارت انسانی حق انا لتاڑ آتے چٹفسا کشمیری تا حق خودارادیت نا شرف ءِ کے۔ تدوک آ سال جون اٹی اقوام متحدہ نا انسانی حق کمیشن نا رپورٹ و اوٹی انسانی حق انا لتاڑآتا بارواٹی رپورٹ و اوکان پد برطانیہ و یورپی پارلیمنٹ نا کنڈآن ہندن انگا رپورٹ آک دا ہیت انا شاہدی ءُ کہ کشمیر نا بابت جہانی برادری نا سوچ اٹی اسہ بدلی اس بننگ ءِ۔ برطانیہ و یورپی پارلیمنٹ آتا رپورٹ آتے ٹی اقوام متحدہ نا حق انسانی کمیشن نا سفارشات آتے مون آ تخسا اقوام متحدہ نا انسانی حق کونسل آن خواست کننگاکہ او اسہ جہانی انکوائری اس ٹہیفے ہرا مقبوضہ کشمیر نا دورہ ءِ کے۔
