پاکستان و سعودی عرب سنگتی نا بے مٹ رشتہ غاتے ٹی تفوک ئُ، واپار و زرکاری نا بشخ آتے ٹی ہڑتوم آ کنڈآتا کمکاری ئِ مون آ دننگ کن بھلو گنجائش اس ارے
اسلام آباد۔ 24اپریل (اے پی پی) چیئرمین سینیٹ صادق سنجرانی پارینے کہ پاکستان و سعودی عرب سنگتی نا بے مٹ رشتہ غاتے ٹی تفوک ئُ ، واپار و زرکاری نا بشخ آتے ٹی ہڑتوم آ کنڈآتا کمکاری ئِ مون آ دننگ نا بھلو گنجائش اس ارے ، سعودی زرکار آک پاکستان اٹی زرکاری نا وارخواہی تیان فائدہ ہرفنگ کیرہ۔ چیئرمین سینیٹ داخیال آتا درشانی ئِ چارشنبے نادے آ سعودی ڈل انا پارلیمنٹ ہاﺅس آ بننگ و سعودی شوریٰ کونسل نا چیئرمین ڈاکٹر عبداللہ بن محمد بن ابراہیم الشیخ تون پارلیمنٹ ہاﺅس اٹی اوڑدہی ٹی کرے۔ اوڑدہی ٹی تین پہ تینی است خواہی نا معاملہ غاتون اوار اہم انگا معاملہ غاتیا سرجم گپ و تران کننگا۔ اوڑدہی ٹی قائد ایوان شبلی فراز، راجہ محمد ظفرالحق ، شیری رحمان و ایلو باسک آک ساڑی ئسر۔ چیئرمین سینیٹ دفاعی بشخ آتے ٹی کمکاری ئِ ہم بے کچ اہم گوندا۔ اوپارے کہ ہڑتوم آ ملک آک دفاع نا بشخ اٹی کمکاری کن مفاہمتی یات داشت آتیا دستخط ہم کرینو۔ چیئرمین سینیٹ سعودی عرب نا ولی عہد نا دورہ پاکستان ئِ ہم ہڑتوم آ ملک آتے کن بے کچ اہم گوندا۔ چیئرمین سینیٹ سعودی ولی عہد نا کنڈآن پاکستانی بندی تا یلہ کننگ نا فیصلہ ئِ اسہ جوان ئُ گام اس گوندا، چیئرمین سینیٹ صادق سنجرانی پاکستان و سعودی عرب نا نیام اٹ سپریم کوارڈینیشن کونسل نا جوڑ کننگ ئِ ستاکڑزوک گوندا۔ پاکستانی تے کن حج کوٹہ ئِ ودفنگ و ویزا فیس اٹی کمتی نا ہم فیصلہ نا ستائِ کینہ سعودی شوری کونسل نا چیئرمین ، چیئرمین سینیٹ محمد صادق سنجرانی نا منت واریئِ ہرفے۔ چیئرمین سعودی شوری کونسل پارے کہ پاکستان سعودی عرب کن بے کچ اہم ئُ ملک اسے۔ نن پاکستان تون تینا ہڑتوم آ کنڈآتا تعلقداری تے بے کچ اہمیت ایتنہ۔
