اسلام آباد۔ 02اپریل (اے پی پی) برسلز اٹی پاکستانی سفارت خانہ ٹی سے شنبے نادے آ پاکستان اٹی سیل و سوات نا مون آ دننگ کن سیل و سواتی تا معلومداری کن انفارمیشن کارنراس ملانے۔ برسلز آن ملوک آ بیان نا رداٹ وزیر انسانی حق ڈاکٹر شیریں مزاری معلوماتی کارنر نا بناءِ کرے۔ ڈاکٹر شیریں مزاری داوخت آ تینا تقریر اٹی سیل وسوات نا اہمیت ءِ مون آ تخسا پارے کہ سیل و سوات ہر ملک انا معیشت اٹی اہم ءُ کڑد اس ادا کیک و ورناتے روزگار فراوان کننگ اٹ کمکار مریک۔ اوپارے کہ حکومت سیل و سوات ءِ مون آ دننگ تون اوار اوار ویزہ پالیسی ٹی ہم آسانی ودی کننگ ءِ و قطبی علاقہ غاتیا ہِننگ کن پابندی ءِ چٹفنگانے ہراڑے ہِننگ کن باضابطہ منظوری درکار مسکہ۔ او برسلز اٹی پاکستانی سفارت خانہ نا سیل و سوات نا مون آ دننگ نا بابت گام گیج آتا ہم ستا ءِ کرے۔ اوپارے کہ ملک انا دودوربیدگ و زیبائی ءِ تالان کروئی مریک دُن کہ پاکستان جغرافیائی اعتبار اٹ برف پوش ٹل، کرک، سرسوز وادی و صحرا تا گل زمین ءِ۔ داوخت آ کے ٹو سرکروک آ بیلجیم نا اولیکو کوہ پیماپال ہیگی تینا خیال آتا درشانی ءِ کرسا پارے کہ دنیا نا ارٹ میکو بڑزانگا ٹل کے ٹو آن بیدس 8 ہزار میٹر بڑز 4ٹل و بھاز انگا بھلا گلیشئرز آک ہم پاکستان اٹی اریر ہراکوہ پیماتیکن جتا ءُ کشش اس تخرہ۔ اوپارے کہ پاکستان نا دودوربیدگ و خلقت آن ملوک آ مہر و مریبت نا ہم ستا ءِ کرے۔ داکان بیدس فوٹوگرافر بینوائت سنیسز جنہوں فوٹوگرافی کن ہنزہ نا 6وار دورہ ءِ کرے ہم تینا عکس آتے نشان تس۔ بنائی دود اٹی بیلجیم و یورپ آن بروک آ خلقت بھلو کچ اسے آن بیدس سیاست دان ، ٹورآپریٹرز ، میڈیانا نمائندہ و یورپی یونین نا عہدیدار آک ہم ساڑی ئسر۔ انفارمیشن کارنر اٹی سیل و سواتی تا است خواہی نا بابت پاکستانی کتب و کتابچہ اس ہم تخنگاسس۔
