ساڑی حکومت نا مثبت پالیسی تیان ٹورازم سیکٹر ترندی اٹ گچین مننگ ءِ، پاکستان ءِ مچ آ دنیا نا سیل وسواتی تے کن است چکوک ءُ ملک اس کینہ
اسلام آباد۔ 02اپریل (اے پی پی) وزیر خارجہ شاہ محمود قریشی پارینے کہ ساڑی حکومت نا مثبت پالیسی تیان ٹورازم سیکٹر ترندی اٹ گچین مننگ ءِ، پاکستان ءِ مچ آ دنیا نا سیل و سواتی تیکن است چکوک ءُ ملک اس جوڑ کینہ، ویزاپالیسی ٹی خوشگوار گچینی ایسون و درملکی سیل و سواتی تے کن آسانی ودی کننگانے و 175ملک آتا شاری تے آن لائن ویزا آسراتی تننگانے ، سیل و سوات ءِ مون آ دننگ ملکی خارجہ پالیسی نا بشخ اسے، کرتارپور راہداری ءِ ملنگ آن نئے بیرہ بھارت تون تعلقداری تیٹی گچینی بریک بلکن داڑان سکھ برادری ءِ مذہبی سیل و سوات کن وارخواہی ہم دوبریک، بدھ مت نا عقیدت مند آتے کن سیل وسواتی ہند آتے ملنگانے۔ داہیت آتے او چارشنبے نادے آ داڑے ٹورازم کانفرنس آن تران کرسا پارے۔ وزیر خارجہ پارے کہ ملک اٹی سیل و سوات نا مون آ دننگ حکومت نا تذویراتی اولیت ءِ، ساڑی حکومت نا مثبت پالیسی تیان ٹورازم سیکٹر گچین مسنے دادے پین شون تننگ کن پین گام گیج کننگ انگ ءِ۔ حکومت دا چرجوئی ٹی نجی سیکٹر تون اوار پبی کمک کننگ ءِ۔ اوپارے کہ ملک اٹی سیکورٹی نا حالیت آتے ٹی گچینی و حکومتی گام گیج آتیان سیل و سوات اٹی مسہ سد درسد ودکی مسنے، ہراڑان حکومت ءِ ارب آ روپئی تا کٹیا دوئی مسنے۔ اوپارے کہ ویزا پالیسی ٹی پورو وڑاٹ گچینی اتنگانے و مچ آ دنیا نا سیل و سوات تے راغب کننگ نا غرض اٹ داٹی آسانی ودی کننگانے۔ کم و ود 175ملک آتا شاری تے آن لائن ویزہ آسراتی تننگانے۔ جہانی سیم آتون گنڈوک غٹ روڈ آتے درملکی سیل و سواتی تیکن ملنگ انگک و پیشن نا ملک پاکستانی مشنز پنچ سال اکن ملٹی پل ویزہ اس جاری کیک، داکان بیدس پوسکن آ ایوی ایشن پالیسی آن قطبی علاقہ غاتے ٹی سیل و سوات ءِ مون آ دننگک۔ وزیر خارجہ پارے کہ سیل و سوات خارجہ پالیس نا بشخ اسے۔ اوپارے کہ دفترخارجہ فارن ایڈوائزریز ءِ چٹفنگ کن ٹھوس کوشست کننگ ءِ ہراٹی پرتگال پاکستان کن ٹریول ایڈوائزی ءِ چٹفینے وخت اس کہ کینیڈا داٹی نرمی کرینے۔ وزیر خارجہ پارے کہ کرتار پور راہداری ءِ ملنگ آن نئے بیرہ بھارت تون تعلقداریک گچین مریرہ بلکن سکھ برادری ءِ مذہبی سیل و سوات کن وارخواہی ہم فراوان مریک، بنجائی، صوبائی و ہندی حکومت آک ، خذمت، ٹرانسپورٹ و مہمان نوازی سیکٹر تون اواری اٹ کاریم کننگ ءُ۔ اوپارے کہ سیل و سوات و آرٹ ءِ مون آ دننگ نا غرض اٹ چندی اسٹیک ہولڈرزآتے خڑک اتنگ کن نیشنل ٹورازم کوآرڈینیشن بورڈ اس ہم ٹہیفنگانے۔ اوپارے کہ ٹورازم سیکٹر ناپین گچینی کن نن ملائیشیا ، ترکی و یو اے ای نا آزموندہ غاتیا ن ہم فائدہ ہرفنہ و پاکستان ءِ مچ آ دنیا نا سیل و سواتی تیکن است چکوک ءُ ملک اس کینہ ۔ اوپارے کہ حکومت نجی سیکٹر ءِ ہم پبی کمک فراوان کیک۔
