وزیراعظم عمران خان نا کماشی ٹی بنجائی کابینہ نا دیوان
بنجائی وزیر اطلاعات و نشریات چوہدری فواد حسین نا بنجائی کابینہ نا دیوان آن پد میڈیا ءِ حوال
اسلام آباد۔ 02اپریل (اے پی پی) بنجائی کابینہ انڈین پریمیئر لیگ(آئی پی ایل ) نا نشریات آتیا پابندی خلنگ، راجی رکھ و انسداد نیزگاری ڈویژن نا جوڑ کننگ، آڈیٹر جنرل آف پاکستان و ملائیشین آڈٹ تون کمکاری نا معاہدہ، وژن انٹرنیشنل نا لیسن، جندی کاروبار کننگ آ حسن عرفان نا آئی پی او آن اینک کننگ، ایئر مارشل ارشد ملک نا سی ای او پی آئی اے، نیشنل انڈسٹریل ریلیشن کمیشن کن مسہ باسک آتا تقرری، پی ایم ڈی سی، او جی ڈی سی ایل، ایس ایس جی پی ایل ، ایس این جی پی ایل کن پوسکن آ بورڈ سرکڑدہ و باسک ، بینکنگ عدالت لاہور، لاہور سیون و فیصل آباد کن جج آتا تقرری ، فاٹا نا خاصہ دار و ایلو سیکورٹی فورس آتے کن 58.3بلین نا فنڈ انا منتقلی و اقتصادی رابطہ کمیٹی (ای سی سی ) نافیصلہ غاتا منظوری ءِ تسنے، وزیراعظم عمران خان تیرمہ خاص کر روچہ مبارک اٹی بجلی نا لوڈشیڈنگ کپننگ، خولم نا پوسکن آ پیدوار نا ہلنگ، آخبت یخ آتے ٹی گیس انا مطلوبہ مقدار ءِ المی کننگ، پوسکن آ گاڈی تیا ودکی زر انا چٹفنگ کن جامع پالیسی اس جوڑ کننگ نا پارت کرینے۔ وزیراعظم علی محمد مہر انا اُراغا داڑیلی و ٹھپی مننگ نا معاملہ نا رپورٹ ءِ بٹنگانے۔ سے شنبے نادے آ بنجائی وزیر اطلاعات و نشریات چوہدری فواد حسین وزیراعظم عمران خان نا کماشی ٹی بنجائی کابینہ نا دیوان آن پد میڈیا ءِ حوال ترسا پارے کہ بنجائی کابینہ ناد یوان نا بناآ بنجائی وزیر ہوابازی میاں محمد سومرو علی محمد مہر نا اُراغا داڑیلی نا معاملہ غا دیوان نا چکار ءِ کرفے، وزیراعظم عمران خان دا معاملہ نا سرجم رپورٹ ءِ بٹنگانے۔ دیوان اٹی بنجائی وزیر پارلیمانی امور بریگیڈیئر (ر) اعجاز شاہ اولیکو وار بشخ ہلک، کابینہ نا باسک آک اودے مبارکباد تسر۔ اوپارے کہ نیزگاری نا چٹفنگ کن راجی رکھ و انسداد نیزگاری نا پن اٹ اسہ پوسکن ءُ ڈویژن اس جوڑ کننگانے ، تاریخ اٹی اولیکو وار نیزگاری نا چٹفنگ کن جتا ءُ ڈویژن اس جوڑ کننگانے، شماریات ڈویژن نا پن ءِ بدل کرسا دا ڈویژن ءِ جوڑ کننگانے، دا ڈویژن نا سروک ڈاکٹر ثانیہ نشتر مریک دا ڈویژن وزارت ڈٹ بندی، شونداری و اصلاحات نا رداٹ کاریم کیک۔ اوپارے کہ منہ بندغ واتوڑ کننگ ءُ کہ بے نظیر انکم سپورٹ پروگرام نا پن ءِ بدل کننگ انگ ءِ ، دُن اسل مفننگ ءِ ، بے نظیر انکم سپورٹ پروگرام تینا جاگہ غا کاریم کرسا کیک ولے دا پوسکن آ ڈویژن نا رداٹ مریک ، داکان بیدس بیت المال ، زکواۃ ، جان جوڑی کارڈ پروگرام تون اوار دا وڑنا ایلو ادارہ غاک ہم پوسکن آ ڈویژن نا ماتحت مریرہ وخت اس کہ غربت مٹاؤ پروگرام نا رداٹ اسہ پوسکن ءُ پروگرام اس احساس و کفالت ہم بناکننگانے، ہمو ورناک ہرا کاروبار نا بناءِ کننگ خوارہ ولے اوفتے تون بینک گارنٹی اف اوفتے آسان وام تا آسراتی تننگک۔ اوپارے کہ بھارتی رویہ آن پد پاکستان نا میڈیا، فلم انڈسٹری، کیبل آپریٹر ز، فنکار ، ادارہ غاک ہم ردعمل نا وڑاٹ بھارتی مواد آتا بائیکاٹ کریر ولے داسکان آئی پی ایل نا میچ آتے گڑاس کیبل آتیا نشان تننگ انگ ءِ ، وزارت اطلاعات و نشریات کابینہ نا چکار ءِ داکنڈا کرفینے و خواست کرے کہ بھارتی آئی پی ایل میچ آک پاکستان اٹی بایدے بند مریر ہراڑا کابینہ آئی پی ایل میچ آتے نشر کننگ آ پابندی خلنگ نا منظوری ءِ تس، پیمرا ءِ ہم پارت تننگانے کہ او دا پابندی آ عمل درآمد ءِ المی جوڑ کے۔ بنجائی وزیر اطلاعات ونشریات چوہدری فواد حسین پارے کہ پاکستان منرل ڈویلپمنٹ کارپوریشن (پی ایم ڈی سی) نا پوسکن آ بورڈ انا منظوری ءِ تننگانے، پی ایم ڈی سی بورڈ انا چیئرمین شمس الدین شیخ مریک وخت اس کہ باسک آتے ٹی اعجاز احمد، محمد داؤد ، ارشاد علی کھوکھر و تعلقدار ادارہ نا کمامدارآک مریرہ۔ آئل اینڈ گیس ریگولیٹری اتھارٹی (اوجی ڈی سی ایل) نا پوسکن آ بورڈ انا ہم منظوری ءِ تننگانے ، بورڈ انا چیئرمین قمر جاوید وخت اس کہ محمد اکبر کے پی کے، سعدیہ خان سندھ، نثار احمد باسک پنجاب ءِ۔ سوئی سدرن گیس لمیٹڈ کمپنی نا پوسکن آ بورڈ انا ہم منظوری ءِ تننگانے، شمشاد اختر ایس ایس جی پی ایل نا چیئرپرسن وخت اس کہ باسک آتے ٹی قاضی عظمت عیسیٰ، فیصل بنگالی و رضوان فرید اوار ءُ۔ سوئی نادرن گیس لمیٹڈ کمپنی (ایس این جی پی ایل ) نا پوسکن آ بورڈ انا ہم منظوری ءِ تننگانے ، سید دلاور حسین ایس این جی پی ایل بورڈ انا چیئرمین وخت اس کہ باسک آتے ٹی ڈاکٹر سہیل ، ایم اے میاں، ایم ایس روحی، حمایت اللہ خان و ادارہ نا کمامدارآک اوار ءُ۔ اوپارے کہ بنجائی کابینہ نیشنل انڈسٹریل ریلیشن کمیشن کن مسہ باسک نورزمان ، امام علی شاہ و سید انعام الرحمان نا تقرری، بینکنگ عدالت فیصل آباد کن امجد نذیر چوہدری ، بینکنگ عدالت لاہور کن سردار طاہر ، بیکنگ عدالت لاہور سیون کن رانا نذیر اقبال نا تقرری نا منظوری ءِ تسنے۔ اسہ سوج اسے نا ورندی ٹی بنجائی وزیر چوہدری فواد حسین پارے کہ پاکستان نا معیشت و ڈالر نا نہاد اٹی شیف بڑزی ضرور ارے ولے ہراتم نن دا ملک انا معیشت ءِ سنبھالاسن ہمووخت آن اینو نا معیشت بھلو حد اسسکان گچین ءِ۔
