اسلام آباد۔ 27 مارچ(اے پی پی) وزیراعظم عمران خان پارینے کہ نیزگاری نا چٹفنگ کن غٹ ءِ اواری اٹ جہاد کروئی ءِ، نیزگاری نا چٹفنگ نا اسہ فارمولااس اف بلکن دا جامع گام گیج آتا متقاضی ءِ، ’’احساس‘‘ نا پن اٹ نیزگاری نا چٹفنگ کن پروگرام اس بناکننگ انگ ءِ داٹی پاکستان نیزگاری آن پیش تمک، پدسلوک و نزور تپہ غاتے کن 80 ارب روپئی نا ودکی کننگ انگ ءِ ، دا زر ءِ بروک آ اِراسال اٹی 120 ارب اسکان ودفنگک، اسہ حکومت اس ہم نیزگاری ءِ کم کننگ کن داخہ زر خڑچ کتنے ، 57 لکھ زالبول نا سیونگ اکاؤنٹس جوڑ کننگک ، خلق آتے ٹی نیزگارزالبول ءِ اُرائی ءُ ککڑ و ایٹ ایتنہ، ہر شار اٹی بے سیبو بندغ آتے کن ہند جوڑ کینہ، بے سوس وام آتے کن پنچ ارب روپئی تخنگانے، پاورٹی ایلیویشن فنڈ اٹی 25 ارب روپئی تننگانے، غٹ آن پدسلوک 45ضلع غاتا 1200 خلق آتے ٹی کنیکٹیویٹی فراوان کننگک، پاکستان نا تاریخ نا غٹ آن جوان انگا بلدیاتی نظام اس درستی راستی کرفنگک، حکومتی ڈغارتیا اخس کہ کھوکہ ارے اوفتے ٹی نیزگارآتا کوٹہ ءِ مقرر کننگک، اسلام آباد نا کچہ انگا آبادی نا رہینگوک آتے فلیٹ جوڑ کرسا مالکانہ حق تننگک۔ اوچارشنبے نادے آ کنونشن سینٹر اٹی پاورٹی ایلیویشن کوآرڈنیشن کونسل نا رداٹ ’’احساس‘‘ نا پن اٹ نیزگاری نا چٹفنگ نا جامع پروگرام نا بنائی دود آن تران کریکہ۔ داوخت آ بنجائی وزیر آک، کابینہ نا باسک آک و الس نا بھلو کچ اس ہم ساڑی ئسر۔ وزیراعظم بے نظیر انکم سپورٹ پروگرام نا چیئرپرسن ڈاکٹر ثانیہ نشتر ءِ نیزگاری نا چٹفنگ نا بابت جامع دستاویز تیار کننگ آ خراج تحسین پیش کرسا پارے کہ نن نیزگاری نا چٹفنگ نا جہاد ءِ بناکرینن، انسان نا دنیا ٹی بننگ نا مسخت ہندادے کہ اللہ اخس کہ زیات ایتک او اوڑاہموخہ زمواری ہم شاغک کہ او اوفتے کن انتس کیک، ہرافتے زیات تتنے ، ہندا اسل زند انا امتحان ءِ۔ وزیراعظم پارے کہ اگہ راج آن نیزگاری ءِ کم کروئی ءِ تو دانا اسہ فارمولااس اف، دا پاننگ مفک کہ اسہ گڑاس کینہ تو نیزگاری کم مریک، نیزگاری نا چٹفنگ کن بھاز انگا گام گیج آتے ہرفوئی تمک، داپروگرام نا سرسہبی کن دادے نافذ کروئی ءِ، داڑکن وزیراعظم ، حکومت ، وزیر آک غٹ اواری اٹ جہاد کینہ۔ وزیراعظم پارے کہ پاکستان دنیا ٹی اسلام نا پن آ جوڑ مروک آ ملک ءِ ہراڑکن پاکستان نا مطلب انت لاالہ الاللہ نا نعرہ ءِ خلنگا ہنداخاطران ننے اسلامی تعلیمات و ریاست مدینہ نا ماڈل ءِ مدام تینا مون آ تخوئی ئسک و دارداٹ عملی گام گیج درکار ئس ولے دا ننا بدبختی ءِ کہ دا ملک اٹی ہچ کس داوخت اسکان پٹ وپول کتنے و دا ماڈل نا پیروی ءِ کتنو، ہر گڑا نا اسہ ماڈل اس مریک ، دنیا ٹی خلقت رول ماڈل مریرہ، ہراکہ انسان سرسہب مریک خلقت اونا زندان ہیل کننگ خوارہ، دنیا نا غٹ آن سرسہب انسان ننا نبی ﷺ ءِ۔
