54 دزگیر کروک آ بندغ آتیا ن سونج و رونج اٹی پلوامہ واقعہ تون اوفتا ہچ ءُ تعلق اس ثابت متنے، دفترخارجہ
اسلام آباد۔ 28 مارچ(اے پی پی) دفترخارجہ اسلام آباد اٹی سفارتی برادری ءِ پلوامہ نا واقعہ نا بابت پاکستان نا بنائی جاست وپاست انا بارواٹی حوال تس۔ دا حوال پنچ شنبے نادے آ وزارت خارجہ ٹی اڈ ہلک ہراٹی اٹارنی جنرل آف پاکستان ، خارجہ و داخلہ سیکرٹریک و ڈائریکٹر جنرل بنجائی جاست وپاستی ادارہ (ایف آئی اے) بشخ ہلکر۔ سفارت کار آتے پاننگا کہ پاکستان نا دا گام گیج پلوامہ جلہو نا بارواٹی بھارت تون کمک کننگ کن اونا عزم اتون ہم گرنچ ءِ۔ اوفتے معلومدار کننگاکہ پاکستان 27 فروری آ بھارت نا کنڈآن اوڑتون دستاویز شیئر کننگ نا دمدستی پد اسہ جاست وپاستی ٹیم اس ٹہیفے و جاست وپاست کن کیہی بندغ آتا تعیناتی آن بیدس بھارتی دستاویز نا بنداوی جزو، سوشل میڈیا نا مواد آتا تیکنیکی پلو آتیا کاریم نا بناءِ ہم کرے۔ انکشاف مس کہ بھارتی دستاویز 91پنہ و 6 بشخ آتیا تالان ئس۔ ہرافتیان ارٹ می و مسٹ میکو بشخ پلوامہ نا واقعہ نا بارواٹی ءِ وخت اس کہ ایلو بشخ آک عمومی دوبہ غاک ءُ۔ پاکستان ہمو بشخ آتیا چکار کرے ہرا پلوامہ نا واقعہ نا بابت ئسر۔ حوال اٹی تالان کننگاکہ جاست وپاست اٹی بھارت نا کنڈآن تروک آ حوال آتا غٹ پلو آتا سرجم جاچ ءِ ہلنگا ہرافتے ٹی عادل ڈار نا ’’امنائی‘‘ وڈیو، جلہو نا زمواری نا’’دعوی‘‘ ، پلوامہ جلہو نا اعانت اٹی ویڈیو و کلہو آتے شیئر کننگ کن کاریم اٹ اتوک آ وٹس ایپ و ٹیلی گرام نمبرز، کالعدم تنظیم نا بابت 90 شکبر بندغ آتا فہرست و مبینہ تربیتی کیمپ آتا 22پیدوار کروک ہندآک اوار ئسر۔ بھارت نا کنڈآن تروک آ جی ایس ایم نمبرآتا رابطہ و سرجزآتا تعلقدارسرجم آتون اوار ڈیٹا نا فراوانی کن سروس پرووائڈر آن خواست کننگا۔ امریکی حکومت ءِ ہم وٹس ایپ آن کمک نا فراوانی نا خواست کننگانے۔ حوال اٹی داہیت آ زور شاغنگاکہ 54دزگیر کروک بندغ آتیان سونج ورونج کننگا ولے داوخت اسکان اوفتا پلوامہ واقعہ تون ہچ ءُ تعلق اس ثابت متنے۔ ہنداوڑ بھارت نا کنڈآن پیدوار کروک 22ہند آتا جاچ ءِ ہلنگا دُن ءُ ہچ ءُ کیمپ اس اف پاکستان درخواست آ داہند آتا دورہ غاتا موکل تننگ کن تیار ءِ۔ دفترخارجہ پارے کہ جاست وپاست نا عمل ءِ برجاتخنگ کن بھارت آن ودکی حوال و دستاویز درکار مریک وخت اس کہ پاکستان دا عمل ءِ ایسر اسکان سرکننگ کن پدریسہ پرعزم ءِ۔
