استنبول۔ 22مارچ(اے پی پی) وزیر خارجہ شاہ محمود قریشی پارینے کہ دیکی راج آتے ٹی پنی سیاست اٹی مسلمان مخالف جوزہ غاتا مون آ بننگ خطرناک ءُ رجحان اسے، مسلمان اقلیت آتا حق انا رکھ اکن او آئی سی نا کہول آ ادارہ جاتی وڑوڈول اس جوڑ کننگے و اسلاموفوبیا نا برخلاف متحدہ محاذ اس ٹہیفنگے، اظہاررائے نا آجوئی نا پن آ خار تالان کننگ انگ ءِ، مسلمان تے پرنگی تیا بھاریم اس گوندسا نسلی تعصب ءِ تالان کننگ انگ ءِ۔ دارجحان دیکی اسکان سلتنے، جمہوریت و سیکولرازم نا دعویدار آک بھارت اٹی مسلمان تا برخلاف تعصب، راجی، سیاسی و معاشی امتیاز کننگ انگ ءِ۔ مقبوضہ جموں و کشمیر اٹی ماورائے عدالت تپاخت آک مننگ ءُ۔ سیاسی واکدار آتا کنڈآن مسلمان تا برخلاف خار تالان کننگ نا پنی آ لہر ءِ توروئی مریک۔ مسلمان ملک آتے ٹی سیوت آن بیدس دا لہر نا مون ءِ توننگ مننگ کپک، نئے تو غٹ مسلمانک دہشت گرد ءُ و نئے غٹ دہشت گرد آک مسلمان ءُ ، القاعدہ غان بیدس ایلو رنگ ونسل و مذہب آتیان تعلق تخوک آدہشت گرد آتے ہم دا فہرست اٹی اوار کننگے۔داخیال آتا درشانی ءِ او جمعہ نادے آ استنبول اٹی او آئی سی نا وزراء خارجہ نا ہلہلئی دیوان آن تران کرسا کرے۔ وزیر خارجہ او آئی سی ایگزیکٹو کمیٹی نا ہلہلئی دیوان ءِ بٹنگ انگ آ ترکی نا منت واری ءِ ہرفسا پارے کہ 15مارچ آ نیوزی لینڈ نا شار کرائسٹ چرچ اٹی مسلمان تا برخلاف خار انا بنداو آ پیش بروک آ دہشت گردی نا است ہسون واقعہ غان پد بے کچ غم انا حالیت اٹ داڑے یکجامسونن۔ اوپارے کہ سانحہ ٹی پنجا کودک انسان شہید مسر ،9شہید آتا تعلق کنا ملک پاکستان آن ءِ۔ پاکستان نا دلیر سپوت ندیم رشید تینا جان ءِ ندر کرسا کیہی انسان تا جان ءِ بچفے، نعیم رشید شہید نا دلیری و بے مٹ جیرت آ حکومت پاکستان اودے بڑزکو سول اعزاز اس تسنے۔ ایلو پاکستانی ہارون محمود، سہیل شاہد، سید اریب احمد و جہانداد علی ئسک ہم ہندا سانحہ ٹی جام شہادت ءِ نوش کریر، است ہسون سانحہ مچ آ دنیا ٹی کروڑ آ انسان تے کن ڈکھ و غم نا سوب مسنے، نیوزی لینڈ نا حکومت و شہید آتا خاہوت آتون دلی ہڑزخواہی و ہمدردی کینہ۔ اوپارے کہ وزیراعظم نیوزی لینڈ و اونا حکومت ءِ خراج تحسین پیش کینہ۔ پاکستان دا ڈکھ و کرب آن واقف ءِ انتئے کہ نن دا دہشت گردی تون مون تسونن۔ نیوزی لینڈ اتون یکجہتی نا درشانی و سانحہ آ ماتن کن پاکستان بیرک نیم چست ئس۔ اوپارے کہ نیوزی لینڈ سانحہ غا جہانی رائے جوڑ ءِ کہ داسانحہ خطرناک رجحان آتا ڈس ءِ ایتک، اوپارے کہ دیکی ٹی گڑاسے نا کنڈآن خلقت نا بننگ ءِ توننگ نا پالیسی تیا عملدرآمد منفی رجحان اسے۔ وزیر خارجہ شاہ محمود قریشی پارے کہ دہشت گرد متنوع و کثیر القومی راج انا اقدار آ جلہو کرینے واوفتیا سم تا برسات ءِ کرینے، دا نسلی بالادستی نا ناقابل قبول و قابل مذمت سوچ آ مبنی راج اس جوڑ کننگ نا کوشست ءِ۔ کرائسٹ چرج واقعہ مرض اس آخا بلکن اونا علامت ءِ۔ وزیر خارجہ بھارت نا ذکر ءِ کرسا پارے کہ پاکستان نا دے ٹکی ہمسایہ بزعم خود جمہوریت و سیکولرازم نا دعویدار ءِ ولے حقیقت اونا برعکس ءِ۔ بھارت اٹی بی جے پی مسلمان تا برخلاف تعصب تخک، راجی ، سیاسی و معاشی پرخ کننگ انگ ءِ ، ہند توابریگیڈ نا دوتیٹی مسلمان تا توہینءِ کننگک و تضحیک نا نشانہ کریر و میئی نا رکھ انا پن آ مسلمان تا خون ءِ کننگک، زوراکی مذہب ءِ بدل کرفیر و سکھ ، مسیح و اقلیت آتے جبر و بیداد نا نشانہ کننگک۔ وزیر خارجہ پارے کہ مقبوضہ جموں و کشمیر اٹی ماورائے عدالت تپاخت آک مننگ ءُ ، برانز کروک آتیا پیلٹ گن انا کاریم اٹ اتنگ معمول مسنے، ریاست شاری تا خون ءِ کننگ ءِ جنسی بیدادی نا حربہ ریاستی دہشت گردی نا پالیسی نا وڑاٹ کاریم اٹ اتنگ انگ ءِ ، سمجھو تہ ایکسپریس اٹی بے گناہ بندغ آتا خون اٹی اوار مرکزی دوبہ دارآتے بھارتی عدالت یلہ کرے، دادوبہ دار آک 68 بندغ نا خون اٹی اوار ئسر ہرافتے ٹی گیشتری مسلمان تا ئس و 44پاکستانی شاری ہم اوفتے ٹی اوار ئسر۔ اوپارے کہ کرائسٹ چرچ انا شہیدآک دا ویل انا سوب نشانہ مسنو ، دااولیکو وار متنے ، نئے آخریکو واقعہ ءِ ، ننے کڑمبی دا ویل آ سجفوئی مریک و اصلاح احوال نا کوشست کروئی مریک ۔ وزیر خارجہ پارے کہ سوشل میڈیا و ایلو فورم تیا خار انگیز مواد آتا تالان مننگ ءِ توننگ کن شریداری و اواری اٹ کوشست آتے مون آ دروئی مریک و او آئی سی ءِ اسلام و مسلمان مخالف پروپیگنڈاتے توننگ و داڑآ نظر تخنگ کن وڑوڈول اس جوڑ و گام گیج تجویز کروئی مریک ، دابندغ، ملک و تنظیم آتون ہیت کروئی مریک ہرا آخبتی خار تالان کننگ ءُ۔ وزیرخارجہ پارے کہ او آئی سی نا کہول آ ادارہ جاتی وڑوڈول اس جوڑ کننگے ہرا مسلمان اقلیت آتا حق انا رکھ اکن کاریم و چاروکی ءِ کے و آخبتی بنداو تیا رپورٹس جاری کننگے ہراٹی مسلمان تا برخلاف دُن انگا رویہ غاتا چاروکی آ مبنی راستکی جمع مرے۔ اوپارے کہ ننے تینا تہہ آن انتہاپسندی، دہشت گردی و خار ءِ ماس کش کروئی ءِ ۔ ننے سلہہ بند جھیڑہ، بے بریبری، مسلمان تا برخلاف امتیازی سلوک نا سوب آتے ایسر کننگ کن کڑد ادا کروئی مریک۔
