اسلام آباد ۔ 22مارچ(اے پی پی) چیئرمین سینیٹ محمد صادق سنجرانی پارینے کہ دیر قدرت نا انمول ءُ ٹیکی اسے داناقدر ءِ کننگ ننے آ فرض ءِ، ساف دیر انا فراوانی اسہ اہم ءُ جہانی ءُ چیلنج اسے، دیری کچٹی پائیدار شونداری نا کسر اٹی اسہ بھاز بھلو اڑاند اسے، ساف دیر اسہ بنداوی انسانی ءُ حق اسے۔ چیئرمین سینیٹ محمد صادق سنجرانی جمعہ نادے آ دیر انا جہانی دے انا وخت آ تینا کلہو اٹی پارے کہ دیر قدرت نا اسہ انمول ءُ ٹیکی اسے ، داناقدر ءِ کننگ ننے آ فرض ءِ ، ساف دیر انا فراوانی اسہ اہم ءُ جہانی ءُ چیلنج اسے۔ اوپارے کہ دیری کچٹی پائیدار شونداری نا کسر اٹی اسہ بھاز بھلو اڑاند اسے ، ساف دیر اسہ بنداوی ءُ انسانی حق اسے۔ پائیدار شونداری نا ہدف آتے ٹی ساف دیر انا فراوانی ہم اسہ اہم ءُ ہدف اسے ولے داڑا نن بھاز پدی اُن۔ داہدف ءِ دوئی کننگ کن سوگو حکمت عملی نا کمک اٹ اواری اٹ کوشست کننگ نا گرج ءِ۔ جہانی کہول آ حکومت آتے اواری اٹ کوشست کننگ نا گرج ءِ۔ اوپارے کہ اسہ ایلو نا آزموندہ غاتیا فائدہ ہرفوئی مریک۔ دیری وسیلہ غاتا شونداری کن ایوان بالابنجا و صوبائی اکائی تے گچین پالیسی سازی ٹی کمک فراوان کننگ ءِ۔ چیئرمین سینیٹ پارے کہ سینیٹ نا آبی وسیلہ نا بابت قائمہ کمیٹی تعلقدار بشخ آتا کمک اٹ حکمت عملی اس جوڑ کننگ اٹ پیش پیش ءِ۔ دیر انا کمتی نا علاقہ غاتے ٹی آبی وسیلہ غاتا مون آ دننگ کن پوسکن ءُ ڈیم جوڑ کننگ المی ءِ۔ صادق سنجرانی پارے کہ کنوئی آ دیر انا بابت جوڑ کروک آ پالیسی و کانود سازی آ عملدرآمد المی ءِ۔
