اسلام آباد۔ 22مارچ(اے پی پی) وزیر خارجہ مخدوم شاہ محمود قریشی پارینے کہ اوغانستان اٹی امن نئے بیرہ اوغانستان بلکن مچ آ ڈیہہ نا جوڑ جاڑ و شونداری کن المی ءِ۔ جمعہ نادے آ استنبول اٹی او آئی سی نا ہلہلئی دیوان نا وخت آ اوغانستان نا تینا ہم منصب صلاح الدین ربانی تون اوڑدہی ٹی گپ و تران کرسا شاہ محمود قریشی پارے کہ پاکستان اوغانستان تون اوار ڈیہہ ٹی وامن و سوگوی کن تینا اسیجا زمواری تے پورو کرسا کیک۔ اوڑدہی ٹی اوغان امن عمل تون اوار تین پہ تینی است خواہی نا معاملہ غاتیا گپ و تران کننگا۔ وزیر خارجہ شاہ محمود قریشی پارے کہ اوغانستان اٹی امن نئے بیرہ اوغانستان کن بلکن مچ آ ڈیہہ نا جوڑ جاڑ و شونداری کن المی ءِ۔ اوپارے کہ نن اولی دے آن اوغان حکومت و اوغان الس نا کماشی ٹی مذاکرات نا مخ تف اُن، پاکستان اوغانستان تون اوار ڈیہہ ٹی امن و سوگوی کن تینا اسیجا زمواری تے پورو کرسا کیک۔ اوغان وزیر خارجہ صلاح الدین پارے کہ اوغانستان اٹی امن کن پاکستان نا کوشست آک ستاکڑزرہ۔ وزیر خارجہ شاہ محمود قریشی ایران نا وزیر خارجہ جواد ظریف و کویت نا نائب وزیراعظم ووزیر خارجہ شیخ صباح خالد حماد تون ہم اوڑدہی کرے۔
