اسلام آباد۔ 13مارچ (اے پی پی) چیئرمین سینیٹ محمد صادق سنجرانی پارینے کہ بنجا و صوبہ غاتا نیام اٹ گچین رابطہ کاری نا کمک اٹ ویل آتاایسری کن کوشست کننگ مریک و دا چرجوئی ٹی پارلیمان نا باسک آتے گچین کڑد ادا کننگ نا گرج ءِ تانکہ ویل آتا پیدوار مننگ کے، و آب اٹو پالیسی سازی اس کننگ مرے۔ او داخیال آتا درشانی ءِ صوبہ بلوچستان آن تعلق تخوک آ صوبائی اسمبلی نا باسک آتون پارلیمنٹ ہاؤس اٹی گپ و تران کرسا کرے۔ چیئرمین سینیٹ پارے کہ بلوچستان قدرتی وسیلہ غاتا دولت آن ہمپوک ءِ و سی پیک ڈٹ آتیان بلوچستان نا الس پبی فائدہ ہرفنگ کیک ہراڑان نئے بیرہ بلوچستان نا تقدیر بدلیفنگ مریک بلکن مچ آ ملک اٹی شونداری و شونہالی اتنگ مریک۔ اوپارے کہ بلوچستان کن وسیلہ غاتا فراوانی داسہ ہچ ءُ ویل اس اف و نن شونداری نا سفر آ روان مسونن انتئے کہ 18 می آئینی ترمیم صوبہ غاتے زیات واکدار جوڑ کرینے و داسہ دا ننا اسیجا زمواری ءِ کہ ننے غٹ ءِ باور کرفن کہ نن شونداری پسند خلقت اُن و شونداری کن پوسکن ءُ کسر پٹنہ۔ اوپارے کہ نن مشکل وخت آن پیش تمانن و مون آ ہِننگ کن قابلیت نا عمل ءِ المی جوڑ کروئی مریک۔ اویوتھ پارلیمنٹ نا جوڑ کننگ نا سلاہ ءِ ترسا پارے کہ داوڑنا پلیٹ فارم آک جمہوری قدر انا مون آ دننگ و شعور تالان کننگ کن اہم ءُ تانکہ ورناچین ءِ ویل آتا آگاہی مرے و اوفتا ایسرکننگ کن کڑد ادا کننگ کیر۔ چیئرمین سینیٹ پارے کہ ایوان بالا بنجائی اکائی تے یکجا کننگ اٹ تاریخی اعتبار اٹ اہم ءُ کڑد ادا کرینے و بلوچستان نا توار ءِ مدام چست کننگانے و ایوان بالا دا ثابت کرینے کہ دا فیڈریشن نا ایوان ءِ۔ اوپارے کہ گچین رابطہ کاری وخت انا اہم ءُ گرج اسے و ننا است خواہی ءِ کہ ادارہ جاتی کمکاری ءِ پین مون آ دننگے۔ اوڑدہی ٹی سینیٹر نصیب اللہ بازئی و محمد یوسف بادینی ئسک ہم ساڑی ئسر۔
