اسلام آباد۔ 13مارچ(اے پی پی) وزیر خارجہ شاہ محمود قریشی پارینے کہ معاشی ایجنڈا ءِ عملی دروشم اس تننگ کن ڈیہہ ٹی امن نا گرج ءِ، اوغانستان اٹی امن ننا ڈیہہ نا جوڑ جاڑ و شونداری کن المی ءِ ہنداخاطران نن اوغان امن عمل کن کمکارنا کڑد ءِ ادا کننگ اُن، حکومت دے ٹکی سیم آ اولیکو دے آن امن و مذاکرات نا ہیت ءِ کننگ اُن، کرتار پور راہداری ءِ ملنگ نا فیصلہ ہم ہندا چرجوئی نا اسہ کڑی اسے، ننے بھاز انگا اقتصادی چیلنج آتا مون تروک ءِ و ننے اوفتیان سماءِ ۔ او سے شنبے نادے آ ’’لیڈرزان اسلام آباد بزنس سمٹ‘‘ آن تران کریکہ۔ داوخت آ پاکستانی و جہانی کمپنی تا سی ای اوز ئسک ہم ساڑی ئسر۔ وزیر خارجہ شاہ محمود قریشی پارے کہ ای 25ملک آتا 60 ڈل آتے دا کانفرنس اٹی بشخ ہلنگ کن پاکستان آ بننگ آ بخیر اٹ پاوہ۔ اوپارے کہ ناقابل تصور نا تصور نا ہیت مننگ ءِ، ننا حکومت ہرا بدلی آ عمل کننگ ءِ او دا تصور نا عملی نمونہ ءِ، ای یورپین یونین ، یورپین پارلیمنٹ نا کمکاری نا منت وار اُٹ۔ اوپارے کہ 26مارچ آ موگیرینی پاکستان آ بننگ ءِ و یورپین یونین و پاکستان نا نیام اٹ اسٹریٹجک شریداری آ مفاہمت نا یات داشت آتیا دستخط کننگک۔ اوپارے کہ ننا حکومت نا اولیت آتیان اسہ اولیت اقتصادی بحالی ءِ، نن خوانہ کہ پاکستانیک داڑے مریر و اوفتے اقتصادی شونداری نا گچین وارخواہی دوبرے و او تینا پاکستانی مننگ آ گمر کننگ کیر۔ ننے بھاز انگا اقتصادی چیلنج آتا مون تروک ءِ و ننے اوفتیان سماءِ۔ اوپارے کہ ننے ادارہ غاتا انحطاط نا ادراک ءِ، 6.6 درسد معاشی نسخان، 10 سال اٹی وام تا بھاریم نا کیہی گنا ودنگ، پیشن نا زرکاری ٹی مستقل کمتی و بے روزگاری، 3/1 آبادی ڈیہہ نیزگاری آن شیف زند ءِ تیر کننگ دا ہمو غٹ چیلنج آک ءُ ہرافتا نن تدوک آ شش تُو آن مقابلہ ءِ کننگ اُن۔ اوپارے کہ دا غٹ منفی عوامل آتون مون تننگ کن و اقتصادی بحالی کن وزارت خارجہ ٹی ننا اولی فوکس معاشی سفارت کاری آ ٹے۔ ننے تینا معاشی ایجنڈا ءِ عملی دروشم اس تننگ کن ننے ڈیہہ ٹی امن نا گرج ءِ۔ اوپارے کہ اوغانستان اٹی امن ننا ڈیہہ نا جوڑ جاڑ و شونداری کن المی ءِ ہنداخاطران نن اوغان امن عمل کن کمکار نا کڑد ءِ ادا کننگ اُن۔ دے ٹکی سیم آ ، ننا حکومت اولی دے آن امن و مذاکرات نا ہیت ءِ کننگ ءِ کرتار پور راہداری ءِ ملنگ نا فیصلہ ہم ہندا چرجوئی نا اسہ کڑی اسے، تانکہ نن خصوصی اقتصادی زون جوڑ کین و پاکستان اٹی زرکاری ءِ مون آ دننگے۔ اوپارے کہ مون نا دور اٹی میٹرو کون آ بھلا ڈٹ آتا بناءِ کرسا وام تیٹی ڈبینگوک معیشت آ سبسڈی نا بھاریم ءِ شاغنگا۔ سعودی عرب تون 20 ارب نا معاہدہ ءِ کننگ ہم ننا اقتصادی بحالی نا کنڈا گام اسے۔ اوپارے کہ مہاتیر محمد زوت پاکستان آ بننگ ءِ نن اونا آزموندہ غاتیان فائدہ ہرفنہ۔
