اسلام آباد۔ 06مارچ (اے پی پی) وزیر خارجہ شاہ محمود قریشی پارینے کہ امریکہ، روس، چین تون اوار کیہی ملک آک پرائیویٹ ڈپلومیسی نا کمک اٹ پاک بھارت بے چیٹی تے کم کننگ اٹ اہم کڑد ااد اکریر۔ دنیا ننا نقطہ نظر ءِ امنا و اونا ستاءِ کرینے۔ بھارت نا اشتعال انگیز و جارحانہ بیان تیان پد ہم سگ انا درشانی ءِ کرین و ننا ردعمل محتاط ئس۔ پاکستان بھارت تون غٹ ایسر نا چاری معاملہ غاتے مذاکرات نا کمک اٹ ایسر کننگ نا خواہندار ءِ۔ پاکستان امن پسند ءُ ملک اسے و علاقائی سوگوی و شونداری و اوغانستان اٹی امن خواہک۔ چارشنبے نادے آ داڑے اسلام آباد انسٹی ٹیوٹ آف سٹریٹجک سٹڈیز نا کنڈآن سی پیک نا بابت کانفرنس آن تران و میڈیا تون ہیت وگپ کرسا وزیر خارجہ پارے کہ وزارت خارجہ پاک چین تعلقداری تیٹی ودکی نا سلاہءِ بخیر اٹ پاہک ۔ وزیر خارجہ شاہ محمود قریشی پارے کہ چین اتون تعلقداری پاکستان نا خارجہ پالیسی نا بنجائی تمبہ ءِ ، سی پیک ڈیہہ نا شونداری کن ہڑتوم آ ملک آتا است خواہی نا شاہدی اسے۔ پلوامہ واقعہ غان پد چینی سرکڑدہ غاک پاکستان و بھارت ءِ ہیت وگپ نا کمک اٹ ویل آتے ایسر کننگ نا مشورہ تس۔ داوخت آ میڈیا تون گپ و تران کرسا اوپارے کہ پاکستان بھارت تون ملٹری آپریشنز ڈائریکٹوریٹ کہول آ ہفتہ وار رابطہ غاتے بحال کننگ کن تیار ءِ وخت اس کہ نئی دہلی ٹی تعینات پاکستان نا ہائی کمشنر سہیل محمود سلابت پورو مننگ آن پد اسہ اِرادے اٹی بھارت آ پدی کاہک ۔ ہندا وڑ حسب وعدہ کرتا رپور راہداری نا بابت معاہدہ نا مسودہ غا ہیت وگپ کن پاکستانی ڈل 14مارچ آ نئی دہلی وخت اس کہ بھارتی ڈل 28 مارچ آ اسلام آباد آ بریک۔ ساڑی آ پاک بھارت بے چیٹی تا بابت اسہ سوج اسے نا ورندی ءِ ترسا وزیر خارجہ پارے کہ امریکی سیکرٹری خارجہ پومپیو نا ترجمان ہم پارے کہ پرائیویٹ ڈپلومیسی ءِ کاریم اٹ اتسا امریکہ بھاز جوان ءُ کڑد اس ادا کرینے۔ چین ، روس، سعودی عرب، ترکی یو اے ای و اردن تون اوار ایلو ملک آک ہم اہم ءُ کڑد ادا کرینو۔ دا ملک آک کوشست کریر کہ پاک بھارت بے چیٹی تے سفارتکاری نا کمک اٹ چٹفنگے۔ دا ملک آک بھارتی وزیر خارجہ سشما سوراج و کنتون پدریسہ رابطہ کریر وخت اس کہ ای اوفتا مون آ پاکستان نا نقطہ نظر ءِ پیش کریٹ۔ کنے خوشی ءِ کہ دنیا ننا نقطہ نظر ءِ امنا کرینے۔ اوپارے کہ پاکستان بھارت تون غٹ ایسر نا چاری معاملہ غاتے مذاکرات نا کمک اٹ ایسر کننگ نا خواہندار ءِ۔ دنیا خنا کہ بھارت نا اشتعال انگیز و جارحانہ بیان تیان پد ہم سگ انا درشانی ءِ کرین و ننا ردعمل محتاط ئس۔ جہانی برادری دہشت گردی نا چٹفنگ و مذاکرات نا کمک اٹ معاملہ غاتے ایسر کننگ نا عزم ءِ امنا کرے۔ اسہ سوج اسے نا ورندی ءِ ترسا اوپارے کہ پاکستان امن پسند ءُ ملک اسے و علاقائی سوگوی و شونداری خواہک۔ پاکستان اوغانستان اٹی امن خواہک و اوغان مصالحتی عمل نا پورو مخ تفی و آسراتی فراوان کننگ اُن۔ جہانی برادری ننا زموارانہ کڑد ءِ امنا و ستاءِ کرے۔ داکان مست کانفرنس آن تران کرسا اوپارے کہ پاک چین تعلقداری پاکستان نا خارجہ پالیسی تا بنداوی تمبہ ءِ۔ پلوامہ واقعہ غان پد چینی سرکڑدہ غاک پاکستان و بھارت ءِ ہیت وگپ نا کمک اٹ ویل آتے ایسر کننگ نا سلاہ تسر۔ وزیر خارجہ پارے کہ سی پیک ہڑتوم آ ملک آتا ڈیہہ نا شونداری نا است خواہی نا شاہدی اسے وخت اس کہ پاکستان سائنس و ٹیکنالوجی ، کشت وکشار ، توانائی و السی رابطہ غاتا بشخ آتے ٹی سی پیک نا رداٹ کمکاری ءِ ودفنگ خواہک تانکہ پاکستان اٹی راجی و اقتصادی شونداری نا پوسکن آ دور بنا کننگ کے۔ اوپارے کہ ہراتم تحریک انصاف نا حکومت اقتدار اٹی بس تو ننے اقتصادی مشکل آک میرات اٹی ملار ولے ساڑی آ حکومت نا کوشست آتیان ملکی و درملکی زرکار و کاروباری بندغ آتا پت اٹی ودکی کرے ہراڑان ملکی اقتصادی حالیت آک شونداری نا کسر آ روان مسنو۔ اوپارے کہ وزیراعظم عمران خان نا سرکڑدہ ہی ٹی حکومت ملک اٹی زرکاری ءِ مون آ دننگ نا پالیسی تیا عمل کننگ ءِ۔ اوپارے کہ حکومت ملک اٹی لس بندغ نا زند انا آب اٹی گچینی آ مبنی راجی و اقتصادی شونداری کن گام گیج کننگ ءِ۔
