اسلام آباد۔ 06مارچ (اے پی پی) بنجائی وزیر جان جوڑی عامر محمود کیانی پارینے کہ اسلام آباد ءِ ہیپاٹائٹس سی و ٹی بی فری اس جوڑ کننگ کن عملی کاریم نا بناءِ کننگانے، اولیکو وار اسلام آباد نا کچہ انگا آبادی تا رہینگوک آتے اوفتا اُرانا درگہ غا ہلوک آ مرض آتا توننگ کن ٹی بی و ہیپاٹائٹس سی انا بابت سکریننگ و ٹیسٹنگ کننگک و ہرا بندغ آک ہیپاٹائٹس سی انا وائرس یا ٹی بی نا مرض اٹی مبتلامریرہ اوفتے آب اٹو درمان کن جی سیون تھری اٹی وزارت جان جوڑی نا کنڈآن جوڑ کروک ماڈل سنٹر آ گدریفنگک۔ داہیت ءِ چارشنبے نادے آ کچی آبادی فرانس کالونی ٹی ہلوک آ مرض آتا توننگ کن ہیپاٹائٹس سی و ٹی بی نا مریض آتا فری سکریننگ ، ٹیسٹنگ کیمپ انا جاری کننگ نا وخت آ تران کرسا پارے۔ وزیر جان جوڑی پارے کہ ماڈل سینٹر اٹی پوسکن انگا تشخیصی مشینری ارے و ہموڑے ہیپاٹائٹس سی و ٹی بی نا مریض آتا کنوک آ دوائی تیان درمان ءِ کننگک و دا دوائی تیان جان جوڑی نا کچ 95 درسد ءِ۔ وزارت جان جوڑی نا کنڈآن دا کیمپ و ماڈل سنٹر نا جوڑ کننگ نا مسخت ہلوک آ مرض آتے ٹی مبتلا بندغ آتے اسہ ہی چھت انا کیرغ آب اٹ ٹیسٹنگ و سکریننگ نا آسراتی فراوان کننگ ناءِ۔ اینو آن فرانس کالونی کچی آبادی ٹی ہلوک آ مرض آتا توننگ کن سکریننگ و ٹیسٹنگ نا باقاعدہ عمل نا بناءِ کننگانے۔ متحرک تربیت یافتہ ٹیمک اُرا اُرا غا ہنسا ہیپاٹائٹس سی و ٹی بی نا سکریننگ و ٹیسٹنگ ءِ کیرہ۔ اومستی پارے کہ ہیپاٹائٹس سی انا مریض آتا مسہ تُو انا درمان ہندن انگا دوائی تے اٹ کننگک ہرافتا ہچ ءُ خراب ءُ اثر اس اف۔ ہیپاٹائٹس سی نا درمان ءِ کرفوک آتے ہیپاٹائٹس بی نا ویکیسن ہم خلنگک و ٹی بی نا مریض آتا درمان ءِ ہم کننگک۔ اوپارے کہ عملہ زیات آن زیات مریض آتا درمان ءِ المی جوڑ کیک۔ دارداٹ زیات مریض آتا حساب وکتاب کن فعال ترین سافٹ ویئر و ڈیٹا بیس ءِ کاریم اٹ اتنگک۔ اسلام آباد نا کچی آبادی تیٹی ٹی بی و ہیپاٹائٹس نا سکریننگ و ٹیسٹنگ آن بیدس پبی آگاہی مہم اس ہم چلیفنگک ۔
