اسلام آباد۔ 04مارچ (اے پی پی) صدر مملکت ڈاکٹر عارف علوی پاکستان و ازبکستان نا نیام اٹ واپاری و معاشی کمکی ءِ پین سوگو کننگ آ زور شاغسا پارینے کہ اسیجا عقیدہ، دودوربیدگ و میرات آ مبنی پاک ۔ازبک خڑکی دوستانہ و برادرانہ تعلقداری تے خاص کر سیل و سوات ، صنعت ، کشت و کشار ، توانائی، تعلیم و سائس و ٹیکنالوجی نا بشخ آتے ٹی کمکاری ءِ پین مون آ ودفوئی مریک۔ اوداہیت ءِ دوشنبے نادے آ داڑے پاکستان اٹی ازبکستان نا سفیر فرکت سیدیکوف تون اوڑدہی ٹی گپ و تران کرسا پارے۔ صدر پارے کہ پاکستان و ازبکستان نا نیام اٹ کڑمب ءُ تعلقداری اسے۔ اوپارے کہ تدوک آ سال تیان تین پہ تینی واپار اٹی ستاکڑزوک ودکی مسنے ولے بروک آ سال تے ٹی دا کچ اٹی پین ودکی کن اسیجا کوشست کروئی مریک۔ اوپارے کہ ازبکستان نا شاندار سالانہ اقتصادی نمو و توانائی وسیلہ وخت اس کہ پاکستان نا بھلا صنعتی و کشاری بنداو ہڑتوم آ کنڈآتا واپاری تعلقداری تے ودفنگ اٹ کمکار جوڑ مننگ کیرہ۔ صدر داہیت آ زور شاغا کہ ہڑتوم آ ملک آتا نیام اٹ مذہبی و دودوربیدگی سیل و سوات نا بھلو وارخواہی اس ساڑی ءِ۔ ہڑتوم آملک آتا شاری تے ویزہ ٹی آسراتی ترسا داڑان پبی فائدہ ہرفنگ مریک۔ اوپارے کہ پاکستان بروک آ 5سال اٹی ازبکستان تون اوار تینا علاقائی ہمسایہ غاتون گیشتر ریل و شاہراتی رابطہ، تیل و گیس پیپ لین نا جوڑ کننگ و بجلی ناٹرانسمیشن لین تالان کننگ آ چکار کیک۔ اوداہیت ءِ تالان کرے کہ قومی شاہراتی و ریل نیٹ ورک اتون گوادر نا بندرگاہ ڈیہہ ٹی ازبکستان ءِ آسان ترین سمندری کسر اس فراوان کیک۔ اوپاکستان، اوغانستان و ازبکستان نا نیام اٹ ریل رابطہ نا بارواٹ ازبکستان نا سلاہ نا ستاءِ کرسا دسمبر 2018 ء ٹی اولیکو ایکسپرٹ میٹنگ نا میزبانی نا خیرمقدم ءِ کرے۔ صدر عارف علوی علاقائی امن و سلامتی خاص وڑاٹ اوغانستان اٹی مصالحتی کوشست آتیا ازبکستان نا گام گیج آتا ہم ستاءِ کرے۔ اوپارے کہ پاکستان اوغانستان اٹی پائیدار امن کن غٹ کڑد ہ غاتا نیام اٹ امن مذاکرات نا پبی مخ تفی و است بڈی ءِ کیک۔ اواقوام متحدہ انسانی حق کونسل کن پاکستان نا سرسہب گچین کاری نا بابت ازبکستان نا مخ تفی نا ہم ستاءِ کرے۔ ازبکستان نا سفیر دہشت گردی نا برخلاف جنگ اٹی پاکستان نا کوشست آتا ستاءِ کرسا پارے کہ ازبکستان اوغانستان نا معاملہ غا پاکستان نا نکتہ نظر نا ستاءِ کیک۔ اوپارے کہ ہڑتوم آ ملک آتا نیام اٹ واپاری و اقتصادی رابطہ غاتے ودفنگ نا بھلو گنجائش اس ارے و نن دا رداٹ پبی کوشست آتے کاریم اٹ اتینہ۔
