وزیر خارجہ شاہ محمود قریشی نا او آئی سی وزرائے خارجہ کانفرنس اٹی بشخ ہلپننگ نا پڑو
اسلام آباد۔ 01 مارچ (اے پی پی) وزیر خارجہ شاہ محمود قریشی او آئی سی وزراء خارجہ کانفرنس اٹی بشخ ہلپننگ نا پڑو ءِ کرسا پارینے کہ مسلم امہ نا دا اہم انگا فورم آ داسہ شیفکو کہول انا کمامدارآک پاکستان نا نمائندگی ءِ کیرہ تانکہ اگہ دیوان اٹی بھارت ءِ مبصر نا درجہ تننگ نا کوشست اس مریک تو اونا پبی مخالفت ءِ کننگے، سویلی ایشیا ٹی امن کن ای صدر ٹرمپ نا دا جوزہ نا قدر ءِ کیوہ، امن و ڈیہہ کن ہر کس کہ ہیت کیک او ستاکڑزک، بھارت نا حکمران جماعت ہر حال اٹ گچین کاری تے کٹنگ خواہک، بھارت نا 23اپوزیشن جماعت آتا اسیجا بیان بسنے کہ مودی تینا سیاست کن ہندوستان نا فوج و فوجی تپاخت آتے کاریم اٹ اتنگ خواہک۔ جمعہ نادے آ پارلیمان نا اسیجا دیوان آن تران کرسا وزیر خارجہ پارے کہ درو قائد حزب اختلاف میاں شہباز شریف و خواجہ آصف ئسک ہم او آئی سی وزراء خارجہ نا دیوان اٹی بھارت ءِ بٹنگ انگ آ گڑتی نا درشانی ءِ کریسر و اوفتا خواست ئس کہ پاکستان بایدے تینا پوزیشن ءِ ہلے۔ اوپارے کہ ہراتم اسیجا قرارداد آ نن سلابت کرینہ تو ہمووخت آ نن ایاز صادق، رضاربانی و خورشید شاہ تون اوار ایلو سیاسی راہشون آتون سلابت کرین، غٹ انا نکتہ نظر پیدوار مسنے۔ اوپارے کہ او آئی سی نا وزارتی دیوان ابوظہبی ٹی مننگ ءِ، بھارت او آئی سی نا باسک و نئے مبصر، بھارت ءِ ننا سلابت آن بیدس بٹنگ انگانے، او آئی سی نا سیکرٹری جنرل ، ترکی نا وزیر خارجہ و ایران ہم بھارت ءِ کانفرنس اٹی بٹنگ انگ آن بے خبر ئسر، بھارت ءِ بٹنگ انگ نا بابت ہراسلابت مروئی ئس او متو۔ وزیر خارجہ پارے کہ متحدہ عرب امارات پاکستان نا سنگت و برادر ملک ءِ ، لکھ آ پاکستانیک متحدہ عرب امارات اٹی کاریم کننگ ءُ، مشکل وخت اٹی یو اے ای پاکستان نا کمک ءِ کرینے ہراڑا نن اونا منت واراُن، یو اے ای بطور میزبان بھارت ءِ سلہ خلک، کنا دامعاملہ غا شرفمند آ شیخ عبداللہ تون ہیت مسنے، ای تاریخی بابت پاکستان نا نکتہ نظر ءِ پیش کریٹ و ای خواست کریٹ کہ بھارت ءِ بٹنگ انگ نا فیصلہ غا نظر ثانی کننگے، شیخ عبداللہ نا موقف ئس کہ ہراتم ننگ بھارت ءِ سلہ خلکونہ تو ہمووخت آ پلوامہ نا واقعہ متویسس، اگہ دا واقعہ مسکہ تو ننا موقف پین مسکہ، چونکہ نن سلہ خلکونن تو ننکن دقت مریک کہ دادے پدی ہلنگے ولے نن داڑا سلابت کینہ۔ وزیر خارجہ پارے کہ 26 فروری آ ہراتم پاکستان آ جارحیت مس تو کنا اوڑتون دُوارہ ہیت وگپ مس ، کنا خواست ئس کہ پاکستان نا الس یو اے ای و اونا باوہ تون مابت کیرہ، مابت نا دا جوزہ و تعلق نا خواست ءِ کہ دا دیوان ءِ معطل کننگے، دا بارواٹ ہرا اوفتا موقف ئس او دے اوفک پیش کریر۔ وزیر خارجہ پارے کہ 26تاریخ آ اوفک اولیکو چھٹی ءِ پیش کریر۔ اوفک چھٹی نا گڑاس مندرجہ غاتے ہم ایوان اٹی خوانسا بنفے ہراٹی پاننگانے کہ بھارت ءِ سلہ ءِ پدی ہلنگے ایلو دروشم اٹ پاکستان تون بشخ ہلپننگ آن بیدس پین ہچ ءُ آپشن اس اف ، 27 تاریخ آ نن اسے پین چھٹی اس نوشتہ کرینن، درونن پین سوچ وبچار و سلابت آن پد اسہ پین چھٹی اس نوشتہ کرین ہرادے اوفتیا گدریفنگانے، او چھٹی ٹی اسیجا قرارداد نا ٹک آتے ہم اوار کرینن و یو اے ای آن خواست کننگانے کہ سلہ ءِ پدی ہلنگے ورنہ او آئی سی نا وزرائے خارجہ نا دیوان اٹی پاکستان بشخ ہلنگ کپک۔ وزیر خارجہ پارے کہ حالیت آتا رداٹ اوفک فیصلہ کرینو کہ او کونسل آف فارن منسٹر نا دیوان اٹی بشخ ہلپنہ ولے دا دیوان اٹی شیفکو کہول انا کارندہ غاک پاکستان نا نمائندگی ءِ کیرہ انتئے کہ کشمیر آ ننا 19 قرارداد ءُ، دا قرارداد آتے ٹی کشمیری الس نا جہد آجوئی و اوفتیا کروک آ بیدادی نا ذکر ءِ۔ پاکستان نا نمائندگی المی ءِ تانکہ اگہ دیوان اٹی بھارت ءِ مبصر نا درجہ تننگ نا کوشست اس مریک تو اونا پبی مخالفت ءِ کننگے۔ اوپارے کہ ترکی نا وزیر خارجہ تون اونا ہیت وگپ مسنے، اونا پاننگ ئس کہ دا اسہ ناقابل قبول ءُ گام گیج اسے۔ وزیر خارجہ پارے کہ او سفارت کاری نا محاذ آ دا ایوان ءِ مروک آ پیش رفت آن معلومدار کننگ خواہنگ ءِ، امریکی وزیر خارجہ تون ای رابطہ ٹی ئسٹ، ای پاکستان و ڈیہہ نا رداٹ پاکستان نا موقف ءِ پیش کرینٹ ہرادے امریکی وزیر خارجہ پہہ مسنے و اودے اہمیت تسنے، درو صدر ٹرمپ اسہ بیان اس تسنے ہراٹی او پارینے کہ او خواپک کہ برصغیر نا ڈیہہ نزوری نا گواچی مرے و داڑے حالیت آک بگڑینگر، صدر ٹرمپ پارے کہ او سفارت کاری کن تینا کمامدارآتون رابطہ غاتے کن پارینے، ای صدر ٹرمپ نا دا جوزہ نا قدر ءِ کیوہ و اونا منت واری ءِ ہرفیوہ، امن و ڈیہہ کن ہر کس کہ ہیت کیک او ستاکڑزک۔ شاہ محمود قریشی پارے کہ دورہ روس اٹی اونا روسی وزیر خارجہ سرگئی لارووف تون ہراتم اوڑدہی مسوسس تو ای اودے ڈیہہ نا حالیت آتیان معلومدار کریسٹ و اودے معلومدار کریسٹ کہ ننے گڑتی ءِ کہ بھارت مایوسی نا عالم اٹ گڑاس گام گیج کننگ کیک، بھارت نا حکمران جماعت ہر حال اٹ گچین کاری تے کٹنگ خواہک، اینو بھارت نا 23اپوزیشن جماعت آتا اسیجا بیان بسنے کہ مودی تینا سیاست کن ہندوستان نا فوج و فوجی تے تپاخت کننگ ءِ کاریم اٹ اتنگ خواہک۔ روس ہم پاکستان و بھارت نا نیام اٹ ہیت وگپ کرفنگ نا سلہ خلکونے، پاکستان داڑکن تیار ءِ ، او بھارت ءِ آمادہ کے ہرااونا متکن آ سنگت ءِ ، بھارت نا دزگیر پائلٹ ءِ اینو پیشیم آ واہگہ سیم انا کمک اٹ یلہ کننگک۔
