اسلام آباد۔ 01مارچ(اے پی پی) بنجائی وزیر اطلاعات و نشریات فواد حسین چوہدری سلہہ بند فوج ءِ خراج تحسین پیش کرسا پارینے کہ پاکستان نا سلہہ بند فوج پاکستان نا کاٹم ءِ فخر اٹ بڑزاکرینے ، مچ آ قوم سوگو ءُ دیوال اسے آنبار پاکستان نا فوج اتون سلوک ءُ۔ شہیدآتا قربانی تا سوب آن ننے آجوئی نا نعمت دوبروک ءِ، بھارت تہہ نا معاملہ غاتے پاکستان آ شاغنگ آ ن پاناد کے، انتہاپسندی نا برخلاف متحد و یکجا مننگ نا گرج ءِ۔ جمعہ نا دے آ پارلیمان نا اسیجا دیوان آن تران کرسا بنجائی وزیر اطلاعات پارے کہ خواجہ آصف ایوان اٹی گڑاس ہیت کرینے ولے امنائی نا ہراچاگڑد ءِ او اودے خراب کننگ خواپک۔ اوپارے کہ ہراوڑ منو بھائی پارے کہ جنگ کس اسے نا مفک، داٹی ہرکنڈا بھس کاری مریک، پارلیمان نا اسیجا دیوان اٹی نن غٹ انا ہیت آتے بنگونن، مچ آ ایوان نا داہیت ءِ امنا ءِ کہ پاکستان جنگ خواپک ولے سوج دادے کہ بھارت اٹی ہم دا امنائی ساڑی ارے یا آخا، اونا ورندی نفی ٹی ءِ۔ بنجائی وزیر پارے کہ تدوک آ سال دسمبر آن داخبر آک بسرہ کہ بھارت گچین کاری تا رداٹ وزیراعظم مودی جارحیت نا چاگڑد اس جوڑ کننگ خواہک، پاکستان ءِ دانا ادراک ئس، وزیر خارجہ و وزارت خارجہ دا چرجوئی ٹی پڑک پی فائیو نا سفیر آتے وخت آ معلومدار کریسس و اوفتیان خواست کریسس کہ او بھارت ءِ داوڑنا ارادہ غاتیان چپ کیر، 14فروری آ پلوامہ نا واقعہ مس، اوڑا ننے افسوز ءِ، اوٹی جانی نسخان مس، 1947ء آن پد بھارت نا غٹ آن بھلا فوجی نسخان ئس و داڑا بھارت نا غصہ فطری ئس ولے دادے پاکستان آ بٹنگ سہی اف، بھارت ءِ خودبینی نا سخت گرج ءِ، پلوامہ نا ہرا علاقہ ٹی دا واقعہ مسنے ہموڑے بھارتی کوزہ گر فوجیک 100 چناتے شہید کرینو، ہموڑے انسانی حق آتا لتاڑنگ نا واقعہ غاک لس ءُ، بھارت ءِ بایدے جاچ ءِ ہلوئی مرے کہ داوڑانت اکن مس، ہموجاگہ نا واقعہ غاتے پاکستان آ شاغپ۔
