لاہور۔ 15 فروری (اے پی پی) سارک چیمبر آف کامرس اینڈ انڈسٹری نا سینئر نائب صدر افتخار علی ملک سعودی عرب نا ولی عہد شہزادہ محمد بن سلمان نا دورہ ءِ پاک سعودی عرب تعلقداری نا تاریخ اٹی اہم ءُ مزل اسے نا نشان گوندسا پارینے کہ داڑان ہڑتوم آ کنڈآتا تعلقداری تے پین مون آ دننگ، خاص وڑاٹ اقتصادی بشخ اٹی کمکاری نا پوسکن ءُ کسر ملنگک و ساڑی واپاری کچ اٹی ودکی مریک۔ تینا اسہ بیان اسے ٹی افتخار علی ملک پارے کہ سعودی ولی عہد محمد بن سلمان اسلامی دنیا نا عظیم انگا راہشون ءِ و سعودی عرب اٹی اونا اقتصادی اصلاحات بے کچ مثبت زہم مرتب کرینے۔ دا اسہ جوان ءُ خیال اسے کہ پاکستان نا وزیراعظم عمران خان نا متحرک سرکڑدہ ہی ٹی ہم معیشت نا بحالی کن اہم اصلاحات درستی راستی کرفنگ انگ ءِ۔ اوپارے کہ پاک سعودی تعلقداری تاریخی و تین پہ تینی است خواہی و پت آ مبنی ءُ و سعودی حکومت مدام ہرمشکل وخت اٹی پاکستان نا است انا حب اٹ کمک ءِ کرینے۔ 2005 ء نا تباہ کن زمی جمب نا وخت آ 10 ملین ڈالر، 2010 ء نا جلاب اٹی 170 ملین ڈالر و 2014 ء نا اقتصادی تنکی ٹی 1.5 بلین ڈالر نا گرانٹ دانا شاہدی اسے ءُ۔ اوپارے کہ دا بے کچ ستاکڑزوک ءِ کہ سعودی عرب وام تفننگ ءِ بلکن زرمبادلہ نا کوڑی تا سوگوی، کرنسی و پیشن نا ادائیگی تا توازن کن کم وود اِرٹ آن مسہ ارب ڈالر و چندی ڈٹ آتے ٹی کم و ود 9 بلین ڈالر نا زرکاری کننگ ءِ۔ او مستی پارے کہ ولی عہد نا دورہ ٹی سعودی عرب رعایتی نرخ آتیا تیل انا تننگ آ آمادہ مس تو دا پاکستان کن بھاز زیات فائدہ تروک مریک و امپورٹ بل آ زور اٹی کمتی بریک۔ افتخار علی ملک پارے کہ ٹیرف و نان ٹیرف اڑاند آتا چٹفنگ آن سعودی عرب ءِ برآمد آتے ٹی گچینی اتنگ مریک انتئے کہ دا مال و خذمت نا واپار اٹی کمتی نا سوب مننگ ءِ۔ اوپارے کہ پاکستان و سعودی عرب نا نیام اٹ ہڑتوم آکنڈآتا واپار نا زبردست لائخی نا باوجود دانا کچ بیرہ 3.4 بلین ڈالر ءِ و دانا توازن ہم سعودی عرب نا حق اٹی ءِ۔ اسٹیٹ بینک آف پاکستان نا حساب وکتاب نا رداٹ تدوک آ مالی سال اٹی پاکستان سعودی عرب آن 3.1 بلین ڈالر نا مالیت درآمد کرے وخت اس کہ برآمد آتا کچ بیرہ 316.7 ملین ڈالر ئس۔ اوپارے کہ ہڑتوم آ ملک آتا زرکارآک واپاری وارخواہی تیان پبی فائدہ ہرفسا ہڑتوم آ کنڈآتا تعلقداری تے پوسکن آ بڑزی تسکان دننگ کیرہ۔ ہڑتوم آ ملک آتا واپاری برادری نا نیام اٹ پوسکن آ معاہدہ و زرکاری نا پوسکن آ وارخواہی تا پٹنگ کن گام گیج آتا ہم گر ج ءِ۔ اوپارے کہ پاکستان ءِ سعودی عرب اٹی آئی ٹی ڈٹ آتا کنٹریکٹ نا دوئی کننگ وکشت وکشار تون اوار پوسکن آ سیکٹر آتا پٹنگ نا کوشست کروئی مریک۔ افتخار علی ملک پارے کہ سی پیک نا میگا پروجیکٹ آتے ٹی سعودی عرب نا زرکاری ہڑتوم آ ملک آتے کن فائدہ تروک مریک ۔ اقتصادی راہداری نئے بیرہ چین ءِ افریقہ و دے ٹک نیامی اسکان ہڑزان رسینگ فراوان کیک بلکن دنیا نا ایلو بھلا معیشت ءِ واپار اٹی ٹرانزٹ آسراتی ترسا پاکستان ہم ارب آ ڈالر کٹیا کننگ کیک۔
