اسلام آباد۔ 15 فروری (اے پی پی) چیئرمین سینیٹ محمد صادق سنجرانی تون مصر انا سفیر احمد محمد فضل یعقوب جمعہ نا دے آ داڑے پارلیمنٹ ہاؤس اٹی اوڑدہی کرے۔ اوڑدہی ٹی تین پہ تینی است خواہی نا معاملہ غاتیا گپ و تران کریر۔ داوخت آ گپ وتران کرسا چیئرمین سینیٹ صادق سنجرانی پارے کہ مصر وپاکستان نا تعلقداری تا بنداو سیاسی، راجی و دودوربیدگی مماثلت آتیاءُ۔ اوپارے کہ پاکستان مصر اتون تعلقداری تے مدام اہمیت تسنے۔ مصر انا قدیم تہذیب و تمدن نا زہم آک مچ آ ڈیہہ ٹی اینو ہم واضح ءُ۔ اوپارے کہ پاکستان مصر اتون ہڑتوم آکنڈآتا تعلقداری تے پین مون آ دننگ نا خواہندار ءِ۔ جہانی و علاقائی تناظر ءِ مون آ تخسا پاک مصر تعلقداری تے پوسکن آ بڑزی تیا دننگ نا گرج ءِ۔ اوپارے کہ واپار، سیل و سوات و زرکاری نا بشخ آتے ٹی اسہ ایلو نا آزموندہ غاتیان پبی فائدہ ہرفنگ مریک۔ چیئرمین سینیٹ پارے کہ پارلیمانی سفارت کاری ءِ کاریم اٹ اتسا السی کہول آ تعلقداری تے مون آ دننگ نا گرج ءِ۔ پارلیمانی و ادارہ جاتی رابطہ غاتا کمک اٹ ویل آتا ایسری و اسہ ایلو ءِ پہہ مننگ اٹ کمک رسینگک۔ اوپارے کہ پاکستانی طالب علم آتے کن جامعہ الازہر اٹی اسکالر شپ انا کمک اٹ بڑزکو تعلیم نا دوئی کننگ نا وارخواہی ودی کننگے۔ اوپارے کہ مسلم امہ داوخت آ تین پہ تینی اختلاف آتا گواچی ءُ۔ ویل آتے مذاکرات نا کمک اٹ ایسر کروئی مریک۔ جنگ ویل آتا ایسر اف، پرامن مذاکرات نا شونداری نا کسر آتے آوار کننگ اٹ کمکار جوڑ مریک۔ اوپارے کہ مسلم امہ نا سیوت کن غٹ ءِ اواری اٹ کوشست کروئی مریک۔ مصر انا سفیر پاک مصر تعلقداری تے مون آ دننگ آ زور شاغسا پارے کہ ہڑتوم آ کنڈآتا کمکاریءِ مون آ دننگ کن بھلو گنجائش اس ساڑی ءِ۔
