بنجائی وزیر پٹرولیم غلام سرور خان تون چینی سفیر نا اوڑدہی، تیل و گیس انا ورکنگ گروپ ءِ کاریمی جوڑ کننگ آ امنا

اسلام آباد۔ 18 جنوری (اے پی پی) بنجائی وزیر پٹرولیم غلام سرور خان تون چینی سفیر یاؤجنگ اوڑدہی کرے۔ اوڑدہی ٹی تیل و گیس انا ورکنگ گروپ ءِ فعال کننگ آ امنا کننگا۔ جمعہ نادے آ پٹرولیم ڈویژن اٹی مروک آ اوڑدہی ٹی پاکستان اٹی چین نا سفیر یاؤجنگ بنجائی وزیر پٹرولیم غلام سرور خان ءِ باوری کرفے کہ او چینی زرکارآتے پاکستان اٹی تیل و گیس انا بشخ اٹی زرکاری کن ترغیب ایتک۔ بنجائی وزیر پٹرولیم غلام سرور خان اوڑدہی ءِ مثبت و ستاکڑزوک گوندساتین پہ تینی رابطہ غاتے برجاتخنگ نا گرج آ زور شاغسا پارے کہ سی پیک پاک۔چین سنگتی نا نشانی اسے۔ اوپارے کہ تیل و گیس انا پٹنگ نا بشخ اٹی چینی زرکار آتے ہروڑ نا کمک و آسراتی تننگک۔ اوڑدہی ٹی مروک آ ساؤتھ نارتھ پیپ لین نا معاہدہ غا ہم سرجم گپ و تران مس۔