مالی وسیلگ آنی وسیلگ آنی تہ ءَ جد رنگی دروشم  برجاہ اِنت، پانڈا ءُ سامورائی بانڈز ءِ وسیلگ ءَ زرّ ءِ رسگ ءِ سر ءَ ھیال ءُ لیکہ کنگ بوھگ ءَ اِنت، سینیٹر  محمد اورنگزیب

اسلام آباد۔13اکتوبر  (اے پی پی): وفاقی وزیر برائے مالیات ءُ آمدنی سینیٹر  محمد اورنگزیب ءَ گوشت کہ پاکستان وتی مالیاتی وسیلگ آناں گیش ءُ گیوار کنگ ءَ برجاہ دار ایت، اے درگت ءَ کرنسی یوآن ءَ گیش بانڈ جاری کنگ ءُ سامورائی بانڈز ءِ وسیلگ ءَ جاپان ءِ مارکیٹ ءَ چہ فنڈز ءِ گرگ ءِ سر ءَ ھم ھیال ءُ لیکہ کنگ ءَ اِنت۔ آئی ءَ اے گپ بنکاک ءَ ورلڈ بینک ءُ انٹرنیشنل مانیٹری فنڈ ءِ سالانہ دیوان ءِ موہ ءَ جاپان ءِ ماہتاک نکی ءَ گوں انٹرویو دیان ءَ کت۔ دوشمبے ءِ روچ ءَ دیوان بندات بوتگ۔ وزیر ءِ ھزانگ ءَ گوشت کہ انوگیں پانڈا بانڈز ءِ جاری کنگ ایوک ءَ یک رند ءِ گامگیج نہ اِنت بلکیں پاکستان چین ءِ سرمایہ کاری مارکیٹ ءَ پدا واتر کنت ءُ آیوکیں وھد ءَ بانڈز ءَ را مدام جاری کنگ ءِ ارادہ کنت، چیاکہ چین دگنیا ءِ دومی مزنیں ءُ گہتریں سرمایہ کاری مارکیٹ اِنت ایشی ءَ چہ کارمرد کنگ ءِ مزنیں گنجائش است اِنت۔ وزیر خزانہ ءَ گوشت کہ پاکستان وتی درملکی قرضہ ءِ کساس ءَ را گیش کنگ نہ لوٹ ایت، بلے جاپانی کرنسی ین ءَ سامورائی بانڈز ءِ جاری کنگ ءَ ھوار فنڈز ءِ وسیلگ آناں گیش تنوع ءِ امکانات آنی چار ءُ تپاسی کنگ ءَ اِنت۔ واجہ محمد اورنگزیب ءَ گوشت کہ سامورائی بانڈ آنی جاری کنگ پاکستان ءِ واستہ موزوں ثابت بوت کنت ءُ اے امکان ءِ سر ءَ سنجیدگی ءَ گوں چار ءُ تپاسی کنگ بہ بیت، بلے اے درگت ءَ گیش پٹ ءُ پول ءُ تصدیق ءِ ضلورت اِنت۔ وزیر ءِ ھزانگ ءَ گوشت کہ راجی ٹیرف پالیشی ءِ سر ءَ ھچ وڑیں سمجھوتہ کنگ نہ بیت ءُ اے پالیشی ایوک ءَ آٹوموبائل شوبگ ءَ گوں بندوک نہ اِنت بلکینگ ءَ توامیں صنعت آنی گوما سیادی داریت۔ آئی ءَ گوشت کہ گوستگیں وھد ءَ حکومت ءَ صنعت آناں رکھینگ داتگ ات، بلے اے رکھینگ ءِ ھلاسی ءِ واستہ ھچ وڑیں ٹائم فریم ایر کنگ نہ بوتگ ات۔ اے رھبند پہ پاکستان ءَ کارآمد ثابت نہ بوت۔ نوں سرکار ءِ مول ءُ مراد ایش انت کہ دمگی صنعت ءَ را رقابت ءِ لائک جوڑ بہ کنت۔ راجی ٹیرف پالیسی برآمدات ءَ را گیش کنگ ءَ کمک کت کنت، ھاسیں رنگ ءَ خام مال ءُ تیار کتگیں سامان آنی برآمدات ءَ را گیش کنگ ءَ کمک کت کنت۔ وزیر خزانہ ءَ جنوب مشرقی ایشیائی ملک آنی ریگولیٹری فریم ورک ءِ مثال ءَ گوشت کہ اے دمگ ءِ ملک آناں 1990ءِ دہائی ءِ گڈ ءَ درآمد ءِ ڈیوٹی کم کتگ ات ایشی ءَ چہ آھاں جتا جتائیں شوبگ آنی تہ ءَ نپ رستگ۔ پاکستان ءِ واستہ اے جنوب مشرقی ایشیائی ملک آنی ماڈل ءِ رد ءَ اقتصادی دیمروئی ءُ صنعتی مقابلہ ءِ نوکیں دور ءِ بندات ھم بوت کنت۔ ایس محمد اورنگزیب ءَ گوشت کہ ملک ءِ تہ ءَ سرجمیں آٹوموبائل کمپنی آنی تہ ءَ پاکستان پیشگام اِنت۔ وزیر ءِ ھزانگ ءَ گوشت کہ آئی ایم ایف پروگرام ءِ ھوالگ ءَ پاکستان ءِ لیکہ مھکم اِنت ایشی ءَ چہ گلوبل کریڈٹ ریٹنگ ایجنسی ءُ سرمایہ کار آنی گوما گپ ءُ تران ءَ ھم کمک کنگ بوھگ ءَ اِنت۔ انوگیں پروگرام ءِ تہ ءَ ملک ءِ معیشت ءَ را پائیدار بنیات ءِ سر ءَ جوڑ کنگ ءِ مول ءُ مراد ءِ رد ءَ ڈھانچہ ءِ اصلاحات ءِ ایجنڈا ھوار اِنت۔ آئی ءَ گوشت کہ پاکستان آئی ایم ایف ءِ کمک ءَ چہ ھما وھد ءَ درکپگ ءِ وس ءَ دار ایت ھما وھد ءَ کہ اے سرپد بہ بیت کہ پاکستان ءَ را ترندیں مالی کمک ءِ واستہ آئی ایم ایف ءِ گوما نزیکی کنگ ءِ دگہ ضلورت نیست۔