اسلام آباد۔ 06جنوری (اے پی پی) ابوظہبی نا ولی عہد شیخ محمد بن زید النہیان (یک شنبے) نادے آ سرکاری دورہ غا پاکستان آ سرمس۔ وزیراعظم عمران خان شرفدار آ مہمان ءِ بخیر کرے۔ تینا دورہ ٹی ولی عہد وزیراعظم تون کمکار نا بیدس اوڑدہی کیک اوکان پد ڈل انا کہول آ گپ و تران ہم مریک۔ وزیراعظم ہاؤس آ سرمننگ آ ابوظہبی نا ولی عہد شیخ محمد بن زید النہیان ءِ جم و جوش اٹ بخیر کننگا۔ سلہہ بند فوج انا چاق و چوبند دستہ شرفدار آ مہمان ءِ سلامی پیش کرے و داوخت آ ہڑتوم آ ملک آتا قومی ترانہ ءِ ہم خلنگا۔ پاک فضائیہ نا جے ایف 17 تھنڈر جہاز آک ہم شرفدار آ مہمان ءِ سلامی تسر۔ مسہ تُو انا کم وخت اٹی پاکستان و متحدہ عرب امارات نا سرکڑدہ غاتا نیام اٹ دا مسٹ میکو اوڑدہی ءِ ہرا ہڑتوم آ ملک آتا نیام اٹ برادرانہ تعلقداری تا خصوصی وڑنا درشانی ءِ۔ متحدہ عرب امارات دے ٹکی نیامی ٹی پاکستان نا غٹ آن بھلا واپاری شریدار و زرکاری نا بھلو ذریعہ اسے۔ متحدہ عرب امارات اٹی 16لکھ آن زیات پاکستانی رہینگ انگ ءُ ہرا سالانہ 4ارب 50 کروڑ دالر پاکستان آ گدریفرہ۔ متحدہ عرب امارات مہالو آن پاکستانی ءِ ادائیگی نا توازن نا تنکی نا مون ءِ توننگ اٹ کمک کن 3 ارب ڈالر نا امداد نا پڑو ءِ کرینے وخت اس کہ موخر ادائیگی آ تیل انا فراوانی آ ہم سجفنگ انگ ءِ۔ شیخ محمد بن زید النہیان نا سرکڑدہ ہی ٹی متحدہ عرب امارات پاکستان امدادی پروگرام نا رداٹ پولیو و تعلیم نا بشخ اٹی غٹ آن بھلا قابل قدر امداد تس۔ او 2007 ء ٹی پاکستان نا آخیریکو وار دورہ ءِ کریسس۔ داکان مست نور خان ایئر بیس آ سرمننگ آ وزیراعظم عمران خان ابوظہبی نا ولی عہد شیخ محمد بن زید النہیان ءِ بخیر کرے و داوخت آ شرفدار آ مہمان ءِ 21 توپ آتا سلامی ہم تننگا وخت اس کہ وزیراعظم ولی عہد ابوظہبی ءِ تین تون تولفسا تینٹ گاڈی ءِ چلیفسا وزیراعظم ہاؤس آ سرمس۔
