کراچی۔ 06جنوری (اے پی پی) صدر مملکت ڈاکٹر عارف علوی پارینے کہ ایوان صدر و گورنر ہاؤس آتے شاری تے کن ملنگ نا حکومتی گام گیج ءِ الس اٹی بھاز است بڈی ملانے، گورنر سندھ عمران اسماعیل نا کراچی ٹی راجی ، ادبی و ایلو جان جوڑی نا سرجزآتے شون تننگ اٹ اہم ءُ کڑد اسے۔ گورنر ہاؤس آن جاری پڑو نا رداٹ داخیال آتا درشانی ءِ او گورنر ہاؤس اٹی اڈ ہلوک آ ہارلے ڈیوڈسن موٹرسائیکلز نا شو انا وخت آ صحافی تتون گپ و تران کرسا کرے۔ صدر مملکت پارے کہ ننے پوسکن آ و متکن آ کلچر ءِ اوار درسا چلینگوئی مریک۔ اوپارے کہ شار اٹی جان جوڑی سرجزآتے مون آ دننگ اٹ گورنر سندھ عمران اسماعیل نا کڑد ستاکڑزک۔ داوخت آ صحافی تتون ہیت وگپ کرسا گورنر سندھ عمران اسماعیل پارے کہ زوت گورنر ہاؤس اٹی مسہ دے ئی ادبی فیسٹیول اس اڈتننگک ہراٹی تعلیم، ادب، دودوربیدگ، سیمینارز، ورکشاپ، کتاب آتا نمائش تون اوار ایلو تعمیری سرجزآتے ہم اڈتننگک۔ عمران اسماعیل پارے کہ ونٹیج اینڈ کلاسک موٹرسائیکلز مالک آک خاص وڑاٹ ستاکڑزرہ کہ ہرافک دا متکن آ ملیپروک آ موٹرسائیکل آتے سنبھالانو۔ گورنر سندھ مستی پارے کہ ونٹیج و کلاسک موٹرسائیکلز نا نمائش اڈتننگ آن ورناتے ٹی بائیک مینو فیکچرنگ نا تاریخ نابارواٹی آگاہی دوئی مریک۔
