اسلام آباد۔ 06جنوری (اے پی پی) بنجائی وزیر اطلاعات و نشریات چوہدری فواد حسین پارینے کہ متحدہ عرب امارات پاکستان اٹی آئل ریفائنری اس جوڑ کیک، ابوظہبی نا ولی عہد شیخ محمد بن زید النہیان نا پاکستان نا دورہ ٹی آئل ریفائنری نا صورت اٹ بھلا زرکاری آ گپ و تران ءِ گڈیکو دروشم تننگانے۔ یک شنبے نادے آ داڑے صحافی تتون ہیت وگپ کرسا بنجائی وزیر پارے کہ متحدہ عرب امارات مست آن ہی ادائیگی تا توازن نا ویل اتون مون تننگ کن پاکستان کن مسہ ارب ڈدالر کیش کمک نا پڑو ءِ کرینے وخت اس کہ پاکستان ءِ موخر ادائیگی تیا تیل انا فراوانی نا رداٹ ہیت وگپ برجاءِ۔ اوپارے کہ متحدہ عرب امارات مشکل وخت اٹی پاکستان تون کمک کرینے انتئے کہ یو اے ای نا سرکڑدہ پاکستان ءِ تینا ارٹ میکو اُراسمجھک۔ ہڑتوم آ ملک آتا نیام اٹ خڑکی برادرانہ تعلقداری ءِ۔ اوپارے کہ شیخ محمد بن زید النہیان نا پاکستان نا دورہ غان ہڑتوم آ ملک آتا نیام اٹ مست آن ساڑی خوشگوار و برادرانہ تعلقداریک پین سوگو مریرہ۔ بنجائی وزیر پارے کہ وزیراعظم عمران خان نا سلہ غا بطور ولی عہد شیخ محمد بن زید النہیان نا دا اولیکو دورہ ئس ، داکان مست او 2007 ء ٹی پاکستان نا اولیکو دورہ ءِ کریسس۔ بنجائی وزیر پارے کہ گدرینگوک آ مسہ تُو اٹی ہڑتوم آ ملک آتا بڑزکو سرکڑدہ غاتا نیام اٹ دا مسٹ میکو رابطہ ئس۔ ہرا ہڑتوم آ ملک آتا نیام اٹ برادرانہ تعقلداری تا خصوصی اہمیت ءِ تالان کیک۔ بنجائی وزیر پٹرولیم و قدرتی وسیلہ غلام سرور خان ’’اے پی پی‘‘ تون ہیت وگپ کرسا پارے کہ ولی عہد شیخ محمد زید النہیان نا پاکستان نا دورہ نا بے کچ مثبت نتیجہ دوئی مریک ۔
