اسلام آباد۔ 04جنوری (اے پی پی) وزیراعظم عمران خان نا کنڈآن راج انا مسکین و پدسلوک آ تپہ غاتے غریبی نا دلدل آن کشنگ نا پالیسی آن ملکی معیشت نا بحالی ٹی کمک رسینگک و چین پاکستان اقتصادی راہداری نا ڈٹ آتیان ودی مروک آ اقتصادی سرجزآتے ٹی خلقت نا زند انا آب گچین مریک۔ معاشی مشکل آتا باوجود وزیراعظم عمران خان کیہی وار شاری تے غریبی آن کشنگ کن اسہ بھاز بھلو غریبی ءِ چٹفنگ مہم اس بنا کننگ نا خواہش نا درشانی ءِ کرینے۔ وزارت پلاننگ نا کمامدارآک اے پی پی ءِ پاریر کہ غریبی نا چٹفنگ نا پروگرام نا چرجوئی ٹی پاکستان و چین نا نیام اٹ کمکاری نا بھلو کاریم نا کچ اس ساڑی ارے۔ ساڑی آ عشرہ غاتے ٹی چین تینا 800 ملین شاری تے غریبی آن کشسا اقتصادی معجزہ اس نشان تس، وزیراعظم عمران خان ساڑی آ دے تے ٹی وار وار پارینے کہ پاکستان تینا شاری تے غریبی نا دلدل آن کشنگ کن چینی ماڈل نا پیروی ءِ کیک۔ بنداوی ڈھانچہ نا جوڑ کننگ غریبی ءِ چٹفنگ مہم اٹی اہم کڑد ادا کننگ کیک، چین پاکستان اقتصادی راہداری نا رداٹ بنداوی ڈھانچہ نا اہم ڈٹ آتیا پیش رفت مننگ ءِ۔ پاکستان اٹی پوسکن آ حکومت نا جوڑ مننگ آن پد ملک اٹی انفراسٹرکچر نا ڈٹ آتے ٹی ہڑتوم آ ملک آک پین کاریم کننگ کیرہ۔ سی پیک نارداٹ ڈٹ آتیان زیات آن زیات فائدہ ہرفنگ و کم کٹیا کروک آ بندغ آتے روزگار نا فراوانی نا وارخواہی ودی کننگ اہمیت تخک۔
