اسلام آباد۔ 03جنوری (اے پی پی) وزیر خارجہ شاہ محمود قریشی پارینے کہ ترکی پاکستان نا بھاز خڑک انگا و پت کروک انگا سنگت ءِ، گچین سیاسی رفاقت و سنگتی ءِ تذویراتی اقتصادی شریداری ٹی بدلیفنگ خوانہ، پاکستان ترکی و آذر بائیجان سہ کڑدہ ہی مذاکرات اٹی اوغان امن عمل و ڈیہہ نا حالیت آتیا گپ و ترا ن مریک۔ پنچ شنبے نادے آ ترکی آ رادہ مننگ آن مست تینا اسہ انٹرویو اسے ٹی اوپارے کہ وزیراعظم عمران خان نا دورہ ٹی ترکی نا صدر تون ہڑتوم آ کنڈآتا معاملہ غاتیا گپ و تران مریک وخت اس کہ ترکی نا بڑزکو سرکڑدہ غاتون ڈل انا کہول آ ہم مذاکرات مریک و ڈیہہ نا حالیت آتیا ترکی نا سرکڑدہ غاتے پت اٹی ہلینہ۔ اوپارے کہ ہڑتوم آ ملک آتا بڑزکو کمامدارآتا نیام اٹ اوڑدہی تے ٹی واپار زرکاری و معیشت نا چندی بشخ آتے ٹیی کمکاری ءِ ودفنگ آ گپ و تران مریک۔ اوغان مفاہمتی عمل نا بابت اسہ سوج اسے نا ورندی ءِ ترسا وزیر خارجہ پارے کہ ترکی اوغانستان اٹی امن نا بابت مدام مثبت کڑد ادا کرینے و ترکی پاکستان نا نقطہ نظر نا مدام مخ تفی ءِ کرینے۔ اوپارے کہ پاکستان و ترکی ڈیہہ نا حالیت آتیا اسہ ایلو ءِ پت اٹی ہلکونو و آخبت اٹی ہم ہلسا کیرہ۔ ترکی مدام سہ کڑدہ ہی مذاکرات اٹی پاکستان نا مخ تفی ءِ کرینے۔ وزیر خارجہ پارے کہ ہمسایہ ملک آتون اوار غٹ ملک آتون تعلقداری تے ترندی اٹ سوگو کننگ کن کوشست کننگ اُن ، دا چرجوئی ٹی جنوری ٹی ترکی و آذربائیجان نا وزیر خارجہ غاک پاکستان آ بریرہ۔ پاکستان ترکی و آذربائیجان سہ کڑدہ ہی مذاکرات اٹی اوغان امن عمل و ڈیہہ نا حالیت آتیا گپ و تران مریک۔
