اسلام آباد۔2جنوری (اے پی پی) دری کارانی وزیر مخدوم شاہ محمود قریشی ءَ گشتگ کہ گوستءَ آسراتی تنا ہاسیں دمگاں حرچ کنگ بوتگ ، تحریک انصاف ءِ حکومت ءَ پدمنتگیں دمگاں آسراتی دیئگءِ گامگیج چست کتگ۔آئیءَ اے گپ چارشمبے ءِ روچءَ گورنر ہاوئس ءَ گورنر پنجاپ ءَ گوں گندءُ نند کنان ءَ کتگ۔ دری کارانی وزیرءَ گشتگ کہ جنوبی پنجاپ ءِ مردمانی زھباری ءَ ہلاس کنگ مے حکومتءِ اولی دلگوشی اِنت۔ آئیءَ گشتگ کہ مزن وزیر عمران خان ءِ سروکی ءَ پی ٹی آئی ءِ حکومت ءَ نوکیں پاکستان ءَ راستیںءُ مھکمیں دیمروئی ءِ بن ہشت ایر کتگ۔ پنجاپ گورنر ءَ معاشی سفارتکاری کانفرنس ءِ جوڑ کنگءَ ہوار، سفارت کاری ءِ جوانیں گامگیج چست کنگءِ سرءَ دری کارانی وزیرءَ را مراد بات داتگ۔
