اسلام آباد۔ 02 جنوری (اے پی پی) الیکشن کمیشن 31 دسمبر 2018 ء اسکان وونٹ انا منتقلی کرفپروک آ شاری تے داآسودہی ءِ تسنے کہ گچین کاری فہرست آتا نظرثانی ٹی رائے دہندگان شناختی کارڈ آ درج ڈس و نشان نا رداٹ تینا وونٹ ءِ 28 فروری 2019 ء اسکان منتقل کرفنگ کیرہ۔ الیکشن کمیشن نا کنڈآن جاری پریس ریلیز نا رداٹ کمیشن آئین نا آرٹیکل (A) و گچین کاری کانود 2017 ء نا سیکشن 36نا رداٹ دوئی اختیار آتے کاریم اٹ اتسا گچین کاری فہرست آتا نظرثانی نا پرمان جاری کرینے تانکہ وونٹ انا بنداوی حق انا رکھ ءِ المی جوڑ کننگ مرے و رائے دہندگان نا وونٹ نا اندراج ءِ شناختی کارڈ آ درج ڈس و نشان تا رداٹ منتقل کننگ مرے۔ گچین کاری فہرست آتیا نظرثانی نا دا عمل اٹ ہمو غٹ وونٹ ہراکہ شناختی کارڈ آ درج آخبتی یا عارضی ڈس و نشان آن بیدس پین ڈس و نشان اسے آ درج ءِ، نا پیدواری ءِ کننگک و اوفتے شناختی کارڈ آ درج ڈس و نشان تیا گدریفنگک۔ دا عمل اٹی رائے دہندگان ءِ ہم داآسراتی تننگ انگ ءِ کہ او شناختی کارڈ آ درج ڈس و نشان نار داٹ تینا وونٹ ءِ منتقل کرفنگ کیر۔ داڑکن وونٹ رجسٹریشن آفیسر، ضلعی الیکشن کمشنر یا اسسٹنٹ رجسٹریشن آفیسر نا دفتر آتے ٹی 28 فروری 2019 ء اسکان فارم نمبر 1 جمع کرفنگ کیرہ۔
