اسلام آباد۔ 01جنوری (اے پی پی) صدر مملکت ڈاکٹر عارف علوی پارینے کہ کتاب نا کلچر و مطالعہ نا عادت شون ہلوک آ قوم تے کن اسلوب اٹی اوار ءِ، ننا ملک اٹی دادے مون آ دننگ نا بے کچ گرج ءِ و دارداٹ نیشنل بک فاؤنڈیشن نا کوشست آک قدر نا قابل ءُ۔ داخیال آتا درشانی ءِ او ایوان صدر اٹی نیشنل بک فاؤنڈیشن نا کنڈآن تروک آ احوال اٹی کرے۔ داوخت آ بنجائی وزیر قومی تاریخ و ادبی میرات ڈویژن شفقت محمود ہم ساڑی ئس۔ صدر مملکت پارے کہ طالب علم، استاد و لس خلقت ءِ آب اٹنگا و اڑزان کتاب تننگ وخت انا اہم ءُ گرج اسے۔ اوپارے کہ کتاب کلچر ءِ مون آ دننگ کن حکومت تون اوار راج انا غٹ تپہ غاتے تینا پبی کڑد ءِ ادا کروئی مریک۔ صدر مملکت نیشنل بک فاؤنڈیشن نا کنڈآن چلیفنگوک آ موبائل بک شاپ و اونا کمک اٹ مر مر انگا علاقہ غاتے ٹی کتاب تا نمائش اڈ تننگ نا ہم ستاءِ کرے و پارے کہ دا کاریم اسہ قومی ءُ خذمت اسے ہرادے پبی وڑاٹ بایدے برجاتخنگے۔
