گورنر پنجاب چوہدری محمد سرور فاضل چیف جسٹس آن سوغند ہلک، دود اٹی وزیراعلیٰ پنجاب ، لاہور ہائی کورٹ نا جج آک، صوبائی وزیر آک، سول و عسکری آفیسر آتون اوار ایلو بڑزکو کمامدارآتا شرکت
لاہور۔ 01جنوری (اے پی پی) جسٹس سردار محمد شمیم خان لاہور ہائی کورٹ نا پوسکن آ چیف جسٹس نا عہدہ نا سوغند ہرفے۔ گورنر پنجاب چوہدری محمد سرور اوڑان سوغند ہلک۔ دا چرجوئی ٹی داڑے گورنر ہاؤس لاہور اٹی اسہ سادہ ءُ و پروقار ءُ دود اس اڈہلک۔ ہراٹی وزیراعلیٰ پنجاب سردار محمد عثمان بزدار، لاہور ہائی کورٹ نا جج آک، صوبائی وزیر آک ، پاکستان بار کونسل نا وائس چیئرمین، لاہور ہائی کورٹ بار ایسوسی ایشن، لاہور بار ایسوسی ایشن نا صدر و ایلو عہدیدار آتون اوار سینئر وکیل آک، بنجائی و صوبائی لاء آفیسر آک، سول و عسکری آفیسر و بڑزکو کمامدارآک ساڑی ئسر۔ سوغندی دود آن پد عدالت عالیہ آ سرمننگ آ فاضل چیف جسٹس ءِ پولیس نا چاک و چوبند دستہ گارڈ آف آنر پیش کرے، داوخت آ عدالت عالیہ نا جج آک ، آفیسر و عدالتی کارندہ غاک فاضل چیف جسٹس ءِ بخیر اٹ پاریر و عہدہ ءِ سنبھالنگ آ مبارکبادی تسر۔ یات سلے کہ چیف جسٹس سردار محمد شمیم خان یکم جنوری 1958ء آ ضلع رحیم یار خان اٹی ودی مس و بنائی تعلیم ءِ ہم ہموکان دوئی کرے۔ بہاولپور آن گریجویشن ءِ پورو کننگ آن پد کراچی آن وکالت نا ڈگری ءِ ہلک۔ فاضل چیف جسٹس 1985 ء ٹی ڈسٹرکٹ کورٹس رحیم یار خان آن تینا وکالت نا باقاعدہ بناءِ کرے۔ شعبہ وکالت اٹی 25سالہ پریکٹس آن پد 19 فروری 2010 ء آ لاہور ہائی کورٹ نا ایڈیشنل جج انا وڑاٹ سوغند ہرفے۔
