اسلام آباد۔ 31 دسمبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ 2018 ء پاکستان اٹی خوشگوار سیاسی بدلی اسے نا سال جوڑ مسنے و 2019 ء پاکستان کن دیرپا شونہالی نا سال جوڑ مریک، عمران خان نا سرکڑدہ ہی ٹی پاکستان آ جہانی برادری نا پت اٹی ترندی اٹ ودکی مننگ ءِ و پاکستان جہانی کہول آ تنیائی نا تاثر آن پیشن پیش تمانے۔ پاکستان ڈیہہ ٹی کشمیر نا ویل انا ایسری و دیرپا امن نا کوشست آتا چرجوئی ٹی کرتارپور راہداری ءِ ملنگ کون آ مثبت گام گیج کرے ہرانا مچ آ دنیا ٹی ستاءِ کننگا۔ پوسکن آ سال انا موقع غا تینا اسہ بیان اسے ٹی بنجائی وزیر پارے کہ مسکوہی حکومت آک پاکستان ءِ بھس کاری نا کسر آ روان کریسر و اوفک پاکستان نا خزانہ ءِ بیرہ تینا جندی فائدہ غاتے کن کاریم اٹ ایسور و ملک ءِ ناقابل تلافی نسخان تسر۔ اوپارے کہ مون نا حکومت آک ملک اٹی ہندن ءُ بے سود ڈٹ خلکر ہرافتا فائدہ بیرہ اوفتا جند ءِ رسینگاکہ و تعلیم، جان جوڑی ، دیر ، کشت وکشار و صنعت کون آ بشخ آتے یکسر گوجالنگا ہرانا نتیجہ دادے کہ اینو پاکستان نا الس ءِ اسہ کنڈ تعلیم، جان جوڑی و کنوئی ءُ ساف دیر کون آ ویل آک مون تروک ءُ و ایلو کنڈ کشت وکشار و صنعت آتا بشخ آتے ٹی جمود نا سوب آن معاشی مشکل آک مون تروک ءُ۔ بنجائی وزیر پارے کہ عمران خان نا سرکڑدہ ہی ٹی تحریک انصاف نا حکومت ملک انا بنداوی معاشی ڈھانچہ ءِ سہی سمت آ خلنگ نا پبی کوشست کننگ ءِ تانکہ ملک انا شونداری کن اسہ ٹھوس ءُ بنداو اس فراوان کننگ مرے۔ اوپرے کہ پوسکن آ سال پاکستان نا معیشت کن ٹیک آف نا سال اس جوڑ مریک و ملک شونداری نا درست سمت انا کنڈاروان مریک۔ اوپارے کہ عمران خان پوسکن آ پاکستان اٹی غٹ تر داخلی و خارجی فیصلہ غاتے صرف اور صرف قومی فائدہ غاتے مون آ تخسا کننگ ءِ و جہانی و علاقائی امن کن پاکستان اسہ زموار ءُ ملک اسے نا کڑد ءِ ادا کننگ ءِ پاکستان ڈیہہ ٹی کشمیر نا ویل انا ایسری و دیر پا امن نا کوشست آتا چرجوئی ٹی کرتارپور راہداری ءِ ملنگ کون آ مثبت گام گیج کرے ہرانا مچ آ دنیا ٹی ستاءِ کننگاتو ایلو کنڈ اوغانستان اٹی امن کن تینا پبی مثبت کڑد ءِ ادا کننگ ءِ۔
