اسلام آباد۔ 31دسمبر (اے پی پی) اسپیکر قومی اسمبلی اسد قیصر دا اومیت نا درشانی ءِ کرینے کہ سال 2019ء پاکستان اٹی معاشی شونداری ٹی ودکی مریک ، لس بندغ نا زندی آب بڑز مریک و جمہوریت سوگو مریک۔ داخیال آتا درشانی ءِ او پوسکن آ سال انا بناء آ قوم انا پن تینا تہنیتی کلہو اٹی کرے۔ اوپارے کہ سال 2019 ء دا حقیقت نا شاہدی ءِ ایتک کہ نن فیصلہ کرینن کہ نن تاریخ ءِ بدل کننگ والا اُن و دادور انا چیلنج آتون مون تننگ کن اسہ پوسکن ءُ عزم اسے تون تینا قومی سفر ءِ بناکننگ کن تیار اُن۔ اوساڑی حکومت نا راج اٹی ساڑی خرابی تے مر کننگ، مظلوم و مسکین تپہ نا بحالی و جامع جمہوریت نا سوگوی نا عز م ءِ دہرائفے۔ اوپارے کہ پاکستان اٹی دہشت گردی نا دیک چٹانو و سال 2019 ء ٹی پاکستان اٹی امن و شونہالی ءِ پین مون آ دننگ دوئی مریک۔ اسد قیصر پاکستان نا دفاع ، سالمیت و سلامتی کن سلہہ بند فوج و کانود نافذ کروک آ ادارہ غاتا خذمت آتے خراج تحسین پیش کرسا پارے کہ مچ آ قوم شہید آتا خاہوت آتون سلوک ءِ ۔ پاکستان ءِ مون تروک چیلنج آتا حوالہ ءِ ترسا اسپیکر پارے کہ ثابت قدم پاکستانی ریاست و راج دا چیلنج آتا مون ءِ توننگ اٹ سرسہب مریک۔ اوپاکستانی قوم ءِ اسہ ایلو نا غٹ اختلاف آتے گیرام کرسا بابائے قوم قائد اعظم محمد علی جناح نا ایمان، سیوت، نظم و ضبط نا راہشون اصول آتیا کاربند مننگ نا گرج آ زور شاغا۔ اوبریبری شونداری و تین پہ تینی ہم آہنگی نا تصور آتے عملی دروشم اس تننگ کن مذہبی ہم آہنگی و بین المذاہب مکالمہ ءِ مون آ دننگ نا گرج آ زور شاغا۔ اودااومیت نا درشانی ءِ کرے کہ پاکستان اٹی ورناتے کاروباری بشخ اٹی ملازمت کن مہارت ءِ مون آ درسا نیزگاری نا چٹفنگ ءِ ممکن جوڑ کننگ نا عمل ءِ برجاتخنگک۔ قائم مقام اسپیکر قاسم خان سوری ملک انا پوسکن آ سال انا بننگ آ قوم ءِ مبارکباد ترسا دا اومیت نا درشانی ءِ کرے کہ پوسکن آ سال نئے بیرہ پاکستان بلکن مچ آ دنیا ٹی خوشی و راحت اتیک و غم و تکلیف آتیان نجات نا سال اس جوڑ مریک۔ اودایخین نا درشانی ءِ کرے کہ سال 2019 ء ڈیہہ و اوڑان پیشن امن، سوگوی و ہم آہنگی نا سال جوڑ مریک۔
